కర్ణాటక హైకోర్టు: మెర్సిడెస్-AMG G63 SUVని సీజ్ చేయడం మరియు దాని రిజిస్ట్రేషన్‌ను రద్దు చేయడం అనేది స్పష్టంగా అధికార దుర్వినియోగమేనని కర్ణాటక హైకోర్టు పేర్కొంది. రవాణా శాఖ అధికారుల చర్యలను చట్టవిరుద్ధం, ఏకపక్షం మరియు చట్టబద్ధమైన పరిమితులను ఉల్లంఘించడంగా కోర్టు అభివర్ణించింది.
జస్టిస్ జ్యోతి ఎం ఈ కేసును విచారిస్తూ, పిటిషనర్ నీరజ్ కుమార్ శర్మకు అనుకూలంగా తీర్పునిచ్చారు. కోర్టులో విచారణ పెండింగ్‌లో ఉన్నప్పుడే కారు రిజిస్ట్రేషన్‌ను రద్దు చేయడాన్ని కోర్టు తీవ్రంగా ఖండించింది. “చట్టాన్ని తమ చేతుల్లోకి తీసుకోవడం మరియు కోర్టు విచారణ పట్ల నిర్లక్ష్యం చూపడం ఆమోదయోగ్యం కాదు” అని కోర్టు పేర్కొంది.
‘అధికార పరిధి దాటిన చర్య’
- ఈ కారును సీజ్ చేసిన అధికారికి ఆ అధికారం లేదని కోర్టు స్పష్టం చేసింది.
- మోటారు వాహనాల చట్టం ప్రకారం, కేవలం మోటార్ వెహికల్ ఇన్‌స్పెక్టర్లు (MVI) లేదా నిర్ణీత హోదా కలిగిన పోలీసు అధికారులకు మాత్రమే వాహనాలను సీజ్ చేసే అధికారం ఉంటుంది.
- ఈ కేసులో రంజిత్ అనే అధికారి ఒక ప్రత్యేక స్క్వాడ్‌లో సభ్యుడిగా ఉన్నప్పటికీ, అతనికి స్వతంత్రంగా వాహనాన్ని సీజ్ చేసే చట్టబద్ధమైన అధికారం లేదు. అందుకే ఆ సీజ్ చట్టవిరుద్ధమని కోర్టు ప్రకటించింది.
అసలు ఈ వివాదం ఏంటి? (ఫ్లాష్ బ్యాక్)
- కొనుగోలు: 2023లో మంగళూరుకు చెందిన ఒక వ్యక్తి HDFC బ్యాంక్ ఆర్థిక సహాయంతో రూ. 1.96 కోట్లకు ఈ మెర్సిడెస్ కారును కొనుగోలు చేశారు.
- మోసం: బ్యాంక్ అనుమతి లేకుండానే ఈ కారును ఇతరులకు విక్రయించడంతో ఢిల్లీ క్రైమ్ బ్రాంచ్ పోలీసులు చీటింగ్ కేసు నమోదు చేశారు.
- వేలం: బ్యాంక్ ఈ కారును స్వాధీనం చేసుకుని, బకాయిలు చెల్లించిన తర్వాత వేలం వేసింది. పిటిషనర్ నీరజ్ కుమార్ శర్మ ఆ వేలంలో కారును కొనుగోలు చేసి, జనవరి 2025లో కర్ణాటకలో రిజిస్ట్రేషన్ చేయించుకున్నారు.
- సీజ్: జూన్ 15, 2025న మైసూరులో రవాణా శాఖ అధికారులు ఈ కారును సీజ్ చేశారు. రూ. 2 కోట్ల విలువైన కారును కేవలం రూ. 35 లక్షల విలువైన మోడల్‌గా చూపిస్తూ రూ. 78 లక్షల ట్యాక్స్ ఎగ్గొట్టారని అధికారులు ఆరోపించారు.
హైకోర్టు తీర్పు మరియు ఆదేశాలు:
పిటిషనర్ దాఖలు చేసిన రిట్ పిటిషన్‌ను అనుమతిస్తూ కోర్టు ఈ క్రింది ఆదేశాలు జారీ చేసింది:
- అధికారులు సమర్పించిన దర్యాప్తు నివేదికను రద్దు (Quashed) చేసింది.
- వాహన రిజిస్ట్రేషన్‌ను రద్దు చేస్తూ ఇచ్చిన ఉత్తర్వులను కొట్టివేసింది.
- వెంటనే వాహన రిజిస్ట్రేషన్‌ను పునరుద్ధరించాలని ఆదేశించింది.
- ఎటువంటి జాప్యం లేకుండా కారును పిటిషనర్‌కు అప్పగించాలని ఆదేశించింది.