ముంబై: భారత క్రిప్టో మార్కెట్‌లో పెను సంచలనం నమోదైంది. దేశంలోని ప్రముఖ క్రిప్టో ఎక్స్ఛేంజ్ CoinDCX సహ-వ్యవస్థాపకులు సుమిత్ గుప్తా, నీరజ్ ఖండేల్వాల్‌లను మోసం ఆరోపణలపై పోలీసులు అరెస్ట్ చేశారు. ఈ వార్త బయటకు రావడంతో పెట్టుబడిదారులు, క్రిప్టో వినియోగదారుల్లో ఆందోళన మొదలైంది. అయితే, కంపెనీ ఈ ఆరోపణలను పూర్తిగా తోసిపుచ్చింది.
తమ సంస్థ పేరును, వ్యవస్థాపకుల గుర్తింపును అడ్డం పెట్టుకుని కొందరు వ్యక్తులు చేస్తున్న పెద్ద కుట్రలో భాగమే ఇదని CoinDCX పేర్కొంది. కొంతమంది కేటుగాళ్లు నకిలీ గుర్తింపులతో సామాన్య ప్రజలను తప్పుదోవ పట్టించి, వారి నుండి డబ్బులు వసూలు చేసి వేరే ఖాతాలకు మళ్లించారని కంపెనీ వివరించింది. ఈ ఘటన డిజిటల్ ఫైనాన్స్ మరియు ఆన్‌లైన్ ఇన్వెస్ట్‌మెంట్ రంగంలో పెరుగుతున్న సైబర్ మోసాలపై ఆందోళనను మరోసారి తెరపైకి తెచ్చింది.
అసలేం జరిగింది? CoinDCX వ్యవస్థాపకులపై మోసం మరియు ఆర్థిక నేరాలకు సంబంధించి ఎఫ్ఐఆర్ (FIR) నమోదైంది. దీని ఆధారంగానే వారిని అరెస్ట్ చేశారు. అయితే, ఈ ఫిర్యాదులో పేర్కొన్న ఖాతాలకు తమ సంస్థకు ఎటువంటి సంబంధం లేదని CoinDCX స్పష్టం చేసింది. కొందరు మోసగాళ్లు తమ బ్రాండ్ పేరును వాడుకుని ప్రజలను లూటీ చేస్తున్నారని కంపెనీ వాదిస్తోంది.
నకిలీ వెబ్‌సైట్ల నెట్‌వర్క్: ఏప్రిల్ 2024 నుండి జనవరి 2026 మధ్య కాలంలో CoinDCXను పోలి ఉన్న సుమారు 1,200కు పైగా నకిలీ వెబ్‌సైట్లు వెలుగులోకి వచ్చాయని కంపెనీ వెల్లడించింది. ఈ వెబ్‌సైట్ల ద్వారానే అమాయక పెట్టుబడిదారులను బురిడీ కొట్టిస్తున్నారని తెలిపింది. ఈ కేసు విచారణలో దర్యాప్తు సంస్థలకు పూర్తిస్థాయిలో సహకరిస్తామని, ఇలాంటి మోసాల పట్ల ప్రజలు అప్రమత్తంగా ఉండాలని కంపెనీ కోరింది.