చెన్నై వేళచ్చేరిలోని ఒక ప్రముఖ ప్రైవేట్ బ్యాంక్ శాఖలో జరిగిన 2 కిలోల బంగారు నగల దొంగతనం ఉదంతం అత్యంత విచిత్రంగా ఉంది. ఒక బ్యాంక్ అధికారి ఇలా కూడా ప్రవర్తిస్తారా అన్న అనుమానం కలగక మానదు. బ్యాంక్ లాకర్లకు భద్రతా అధికారిగా ఉన్న మహిళే ఈ పని చేశారన్న వార్త అందరినీ షాక్‌కు గురిచేస్తోంది.
అసలేం జరిగింది? వేళచ్చేరిలోని సదరు బ్యాంక్ మేనేజర్ అహ్మద్ ఖాద్రి (46) పోలీసులకు ఫిర్యాదు చేస్తూ.. తమ బ్యాంక్‌లో ఒక బ్యాగులో 1.25 కిలోల బంగారు నగలు అనాథగా పడి ఉన్నాయని తెలిపారు. బురఖా ధరించిన ఒక అపరిచిత మహిళ బ్యాంక్‌కు వచ్చి, ఆ నగలను అక్కడ వదిలేసి వెళ్ళిందని వారు అనుమానించారు. ఆమె బ్యాంక్‌లో సాధారణ కస్టమర్‌లా తిరుగుతూ, లాకర్ల గది వైపు కూడా వెళ్ళిందని, ఎవరూ గుర్తుపట్టకముందే మాయమైందని పేర్కొన్నారు.
బురఖా వెనుక మర్మం – మాల్‌లో బట్టబయలు: పోలీస్ కమిషనర్ అరుణ్ ఈ కేసును సెంట్రల్ క్రైమ్ బ్రాంచ్‌కు బదిలీ చేశారు. పోలీసులు సీసీటీవీ దృశ్యాలను పరిశీలించగా.. బురఖా ధరించిన మహిళ ఒక కుర్చీలో కూర్చున్నట్లు, ఆమె లేచి వెళ్ళిన తర్వాత ఆ కుర్చీ కిందే నగల బ్యాగ్ ఉన్నట్లు గుర్తించారు. ఆ మహిళ బ్యాంక్ నుండి బయటకు వచ్చి ఆటోలో ఎక్కి పలు ప్రాంతాలు తిరిగి, చివరకు ఒక షాపింగ్ మాల్‌లోకి వెళ్ళింది. అక్కడ మాల్ వాష్‌రూమ్‌లోకి వెళ్లి బురఖా తీసేసి, చీర కట్టుకుని బయటకు వచ్చి తన ఇంటికి వెళ్ళింది. ఈ దృశ్యాలన్నీ కెమెరాలో రికార్డ్ అయ్యాయి.
దొంగ ఎవరంటే? ఆ మహిళ ఫోటోను చూసిన బ్యాంక్ యాజమాన్యం షాక్‌కు గురైంది. ఆమె అదే బ్యాంక్ బ్రాంచ్‌లో లాకర్ల ఇన్‌ఛార్జ్ అధికారిగా పనిచేస్తున్న పద్మప్రియ (38) అని గుర్తించారు. ప్రస్తుతం ఆమె సెలవులో ఉంది. పోలీసులు ఆమెను అదుపులోకి తీసుకుని విచారించగా విస్తుపోయే నిజాలు బయటపడ్డాయి.
నగలు ఎలా దొంగిలించింది? నిబంధనల ప్రకారం లాకర్లలో ఏముందో అధికారులకు తెలియకూడదు. కానీ పద్మప్రియ ఇద్దరు కస్టమర్లతో స్నేహంగా మెలిగి, వారి నమ్మకాన్ని చూరగొని లాకర్ల తాళం చెవులు సంపాదించింది. మొదట ఒక కస్టమర్ లాకర్ నుండి 300 గ్రాముల నగలు దొంగిలించింది. ఆ కేసులో ఆమె ఇప్పటికే పట్టుబడి జైలుకు కూడా వెళ్లొచ్చింది.
తర్వాత రెండో కస్టమర్ లాకర్ నుండి ఒకటిన్నర కిలోల నగలను కాజేసింది. అయితే రెండోసారి కూడా పోలీసులు తనను పట్టుకుంటారనే భయంతో, ఆ నగలను తిరిగి లాకర్‌లోనే పెట్టేయాలని ప్లాన్ వేసింది. అందుకే గుర్తుపట్టకుండా ఉండటానికి బురఖా వేసుకుని బ్యాంక్‌కు వచ్చింది. కానీ లాకర్ లోపల నగలు పెట్టడం సాధ్యం కాకపోవడంతో, వాటిని అక్కడే కుర్చీ కింద వదిలేసి పారిపోయింది. తీవ్ర విచారణ అనంతరం పోలీసులు పద్మప్రియను అరెస్ట్ చేసి కోర్టులో హాజరుపరిచి జైలుకు తరలించారు.