జైలులో ఉన్న ఖైదీలకు చదువు చెప్పడానికి నియమించబడిన ఒక టీచర్, అక్కడే ఉన్న ఒక ఖైదీతో ప్రేమలో పడింది. అతడికి ‘ఎక్స్ట్రా క్లాసులు’ చెప్పే నెపంతో ఏకాంతంగా గడుపుతూ, పలుమార్లు శారీరక సంబంధం కూడా పెట్టుకుంది. అంతా బాగానే సాగుతోందనుకున్న సమయంలో ఇతర ఖైదీలకు అనుమానం వచ్చి జైలు యంత్రాంగానికి సమాచారం అందించారు. విచారణలో నిజం తేలడంతో ఆమెను అరెస్టు చేశారు. తాజాగా కోర్టు ఆమెకు ఏడాది జైలు శిక్ష విధించింది.
అసలేం జరిగింది?
డైలీ మిర్రర్ (UK) నివేదిక ప్రకారం.. బ్రిటన్కు చెందిన కెల్లీ డఫీ (36) గతంలో స్కూల్ టీచర్గా పనిచేసేది. మే 2024లో స్కూల్ ఉద్యోగం వదిలేసి విల్ట్షైర్లోని ‘HMP ఎర్లెస్టోక్’ జైలులో అసిస్టెంట్ టీచర్గా చేరింది. అక్కడ ఖైదీలకు పాఠాలు చెబుతున్న సమయంలో యాష్లే గుడ్రిడ్జ్ (38) అనే ఖైదీతో ఆమెకు పరిచయం ఏర్పడింది. అది కాస్తా ప్రేమగా మారింది.
స్టడీ రూమ్లోనే సంబంధం
జైలులోని స్టడీ రూమ్లో వీరిద్దరూ పలుమార్లు ముద్దులు పెట్టుకోవడం, శారీరక సంబంధం పెట్టుకోవడం వంటి పనులు చేశారు. ఒకరికొకరు ‘ఐ లవ్ యూ’ అని మెసేజ్లు, ఫోటోలు కూడా పంపుకున్నారు. విచిత్రమేమిటంటే.. కెల్లీ ఈ విషయాన్ని జైలు లైబ్రేరియన్తో కూడా పంచుకుంది. ఆ లైబ్రేరియన్కు కూడా మరో ఖైదీతో సంబంధం ఉండటం గమనార్హం. వీరిద్దరూ తమ ప్రేమ వ్యవహారాల గురించి టీనేజ్ అమ్మాయిల్లా నవ్వుకుంటూ చర్చించుకునేవారని సమాచారం.
అయితే, ఖైదీతో సంబంధం పెట్టుకున్నప్పటికీ కెల్లీ జైలు భద్రతకు ఎప్పుడూ విఘాతం కలిగించలేదు. జైలులోకి నిషేధిత వస్తువులను తీసుకురావడం వంటి పనులేవీ ఆమె చేయలేదు. అయినప్పటికీ, నిబంధనలను ఉల్లంఘించినందుకు ఆమెకు శిక్ష తప్పలేదు.
ఏడాది జైలు శిక్ష
ఈ కేసును విచారించిన జడ్జి క్రిస్టోఫర్ పార్కర్.. కెల్లీ ఒక పిచ్చి వ్యామోహంలో పడిపోయిందని వ్యాఖ్యానించారు. ఈ పని వల్ల కలిగే ప్రమాదాలు తెలిసినప్పటికీ ఆమె తప్పు చేస్తూనే ఉందని పేర్కొన్నారు. కెల్లీ కోర్టులో తన తప్పును అంగీకరించి, క్షమించమని కోరినప్పటికీ జడ్జి ఆమెకు ఒక సంవత్సరం జైలు శిక్ష విధించారు.
ఖైదీపై చర్యలు లేవు
మరోవైపు, ఈ వ్యవహారంలో ఖైదీ యాష్లే గుడ్రిడ్జ్పై ఎలాంటి అదనపు చర్యలు తీసుకోలేదు. అతను జైలులో శిక్షణ పూర్తి చేసుకుని, విడుదలయ్యాక నిజాయితీగా బతకాలని భావిస్తున్నాడు. అతను గంజాయి సాగు చేసిన కేసులో జైలు శిక్ష అనుభవిస్తున్నాడు.