పొలాల్లోనో, ఇంటి ఆవరణలోనే బంగారం దొరికిందని మనం ఎన్నో కథలు విన్నాం. కానీ, నిజంగానే అలాంటి సంఘటన ఒకటి జరిగింది. జూన్ 24న ఒక మహిళా కూలీ ఆరు ఎకరాల పొలంలో గడ్డి కోస్తుండగా, మట్టిలో ఏదో మెరిసే లోహపు ముక్క కనిపించింది.
ఆమె అక్కడ మరింత లోతుగా తవ్వగా, పురాతన బంగారు ఆభరణాలు బయటపడ్డాయి. ఆ పొలం నుండి సుమారు 50 తులాల బంగారం దొరికిందని గ్రామస్థులు చెబుతున్నారు. అయితే, అధికారులు ఇప్పటివరకు ఎంత బంగారం దొరికింది, దాని విలువ ఎంత అనే విషయాలపై ఎటువంటి అధికారిక ప్రకటన చేయలేదు. ఈ ఘటన తెలంగాణలోని వరంగల్ జిల్లాలో జరిగింది. ప్రస్తుతం ఈ బంగారు నిధి ఎవరికి చెందాలనే విషయంలో వివాదం నెలకొంది.
భూ యజమానికే ఆ బంగారాన్ని కూలీలు ఇచ్చేశారని గ్రామస్థులు చెబుతున్నారు. అయితే, గతంలో ఆ భూమికి యజమానిగా ఉన్న వ్యక్తి కుమారుడు పోలీసులకు ఫిర్యాదు చేయడంతో ఈ కేసు కొత్త మలుపు తిరిగింది. “ఈ భూమి అమ్మకానికి ముందు మా ఆధీనంలో ఉండేది. నాకు తెలియకుండానే ప్రస్తుత యజమాని మరియు కూలీలు ఆ బంగారాన్ని పంచుకున్నారు” అని పాత భూ యజమాని ఆరోపిస్తున్నారు.
పోలీసుల దర్యాప్తు ఏ దిశగా సాగుతోంది? “బంగారం దొరికిన భూమి గతంలో మా కుటుంబానికి చెందినది. బంగారం దొరికిన విషయం నాకు తెలియజేయలేదు, నాకు వాటా ఇవ్వలేదు” అని పాత యజమాని పోలీసులకు ఇచ్చిన ఫిర్యాదులో పేర్కొన్నారు. పోలీసులు కేసు నమోదు చేసి దర్యాప్తు ప్రారంభించారు. ఈ నగలు అక్కడ ఎలా వచ్చాయి, వాటిపై అసలైన హక్కు ఎవరిది అనేది పోలీసులు ఆరా తీస్తున్నారు. ఇది చెన్నారావుపేట మండలంలోని కోపకుర్తి (కోపకులాపాడు) గ్రామానికి సంబంధించిన ఘటన.
అపార సంపద, బంగారానికి ఈ రాజ్యమే కేరాఫ్ అడ్రస్ ఈ వార్త తెలియగానే, బంగారం దొరికిన ప్రదేశాన్ని చూసేందుకు గ్రామస్థులు క్యూ కడుతున్నారు. దీంతో వరంగల్ చారిత్రక వైభవం మరోసారి చర్చల్లోకి వచ్చింది. వరంగల్ను పూర్వం ‘ఓరుగల్లు’ అని పిలిచేవారు. ఇది కాకతీయుల రాజధాని. 12 నుండి 14వ శతాబ్దం వరకు తెలుగు నేలను పరిపాలించిన కాకతీయుల కాలంలోనే వరంగల్ కోట, వేయి స్తంభాల గుడి మరియు యునెస్కో గుర్తింపు పొందిన రామప్ప దేవాలయం నిర్మించారు. అప్పట్లో ఈ రాజ్యం అపారమైన సంపదకు, బంగారు నాణేలకు, వజ్రాలు మరియు విలువైన ఆభరణాలకు ప్రసిద్ధి చెందింది.