చెన్నై: తమిళనాడు బీజేపీ రాష్ట్ర ఉపాధ్యక్షుడు కరు. నాగరాజన్‌పై ఆ పార్టీ జిల్లా మహిళా విభాగం అధ్యక్షురాలు తంగ శోభన లైంగిక వేధింపుల ఆరోపణలు చేస్తూ ప్రధాని మోదీకి లేఖ రాయడం రాజకీయ వర్గాల్లో కలకలం రేపుతోంది.
ఆ లేఖలో కరు. నాగరాజన్ తనను బలవంతంగా గదిలోకి లాగి ముద్దు పెట్టుకోవడానికి ప్రయత్నించారని, కారులో లైంగిక దాడికి ఒడిగట్టారని శోభన ఆరోపించారు. ఒకవేళ తన కోరిక తీర్చకపోతే రాజకీయ భవిష్యత్తును నాశనం చేస్తానని ఆయన బెదిరించినట్లు ఆమె పేర్కొన్నారు.
ప్రధాని మోదీకి రాసిన లేఖలోని ముఖ్యాంశాలు:
తంగ శోభన తన లేఖలో ఇలా పేర్కొన్నారు: “నేను 2018లో భారతీయ జనతా పార్టీలో చేరాను. గాంధీ యాత్ర అనే కార్యక్రమంలో కరు. నాగరాజన్ నన్ను కలిశారు. మనమిద్దరం మడిపాక్కం ప్రాంతానికి చెందినవారమని చెబుతూ నా ఫోన్ నంబర్ తీసుకున్నారు. ఒకరోజు రాత్రి ఫోన్ చేసి, నిన్ను చూసినప్పటి నుండి నీపై ఆకర్షణ ఏర్పడిందని, నేను ఒంటరిగా ఉన్నాను నువ్వు రాగలవా అని అడిగారు. రాత్రిపూట నేను ఎవరినీ కలవనని చెప్పి ఫోన్ కట్ చేశాను. ఆ తర్వాత కూడా ఆయన నన్ను వేధిస్తూనే ఉన్నారు.”
“నేను కమలాలయం (బీజేపీ కార్యాలయం) వెళ్ళినప్పుడు, జిల్లా మహిళా నేతగా ఆయనకు గౌరవ వందనం చేయడానికి వెళ్ళాను. అందరూ బయటకు వచ్చాక నన్ను మాత్రం లోపలికి రమ్మని పిలిచారు. నేను గదిలోకి వెళ్ళగానే నా చేయి పట్టుకుని బలవంతంగా ముద్దు పెట్టుకోవడానికి ప్రయత్నించారు. నేను అప్రమత్తమై ఆయన చెంప పగులగొట్టి బయటకు వచ్చాను. పార్టీ ప్రయోజనాల దృష్ట్యా ఈ విషయాన్ని అప్పట్లో ఎవరికీ చెప్పలేదు.”
2022 ఎన్నికల సమయంలో జరిగిన ఘటన: “2022 స్థానిక సంస్థల ఎన్నికల సమయంలో నాకు దక్కాల్సిన సీటును వేరొకరికి ఇచ్చారు. ఆ తర్వాత కరు. నాగరాజన్ నన్ను అర్జంటుగా కలవమన్నారు. పార్టీ పని అనుకుని వెళ్తే, ఎవరూ లేని చోట నన్ను కారులోకి రమ్మన్నారు. కారు డ్రైవర్‌ను బయట నిలబడమని చెప్పి, నాతో అసభ్యంగా ప్రవర్తించారు. ‘నువ్వు నాకు సహకరించి ఉంటే నిన్ను మహారాణిలా చూసుకునేవాడిని’ అంటూ నాపై చేయి వేసి బలాత్కారం చేయడానికి ప్రయత్నించారు. నేను ఆయనను నెట్టేసి, కారు తలుపు తన్ని ప్రాణాలతో బయటపడ్డాను.”
“ఈ విషయంపై గతంలో మాజీ రాష్ట్ర అధ్యక్షుడు అన్నామలై మరియు ఇతర ముఖ్య నేతలకు ఫిర్యాదు చేశాను. విచారణ జరిపి చర్యలు తీసుకుంటామని హామీ ఇచ్చారు కానీ ఇప్పటివరకు ఏమీ చేయలేదు. ఇప్పుడు కరు. నాగరాజన్ నన్ను బెదిరిస్తున్నారు. పార్టీలోని కొందరు వ్యక్తులు కూడా నన్ను అసభ్య పదజాలంతో దూషిస్తున్నారు.” అని ఆమె ఆవేదన వ్యక్తం చేశారు.
పార్టీ గౌరవాన్ని కాపాడాలని, తనలాంటి మహిళా కార్యకర్తలకు రక్షణ కల్పించాలని, కామాంధుడైన కరు. నాగరాజన్‌పై కఠిన చర్యలు తీసుకోవాలని ఆమె ప్రధానిని వేడుకున్నారు.