గుండె తరుక్కుపోతోంది..! “తలకిందులుగా పడి తీవ్రంగా గాయపడిన జిమ్నాస్టిక్స్ క్రీడాకారుడు”. కామన్వెల్త్ గేమ్స్‌లో జరిగిన ఘోర ప్రమాదం. భయాందోళనకు గురిచేసే వీడియో.!!

గ్లాస్గో నగరంలో జరిగిన 2026 కామన్వెల్త్ గేమ్స్ పురుషుల టీమ్ జిమ్నాస్టిక్స్ ఫైనల్స్‌లో, ఇంగ్లాండ్ జట్టుకు చెందిన యువ క్రీడాకారుడు గ్యాబ్రియేల్ లాంగ్‌టన్ ఎదుర్కొన్న భయంకరమైన ప్రమాదం ఇరు జట్లతో పాటు ఇటు వీక్షకులను తీవ్ర దిగ్భ్రాంతికి గురిచేసింది.

ఫైనల్ రౌండ్‌లో తన హై బార్ సాహస విన్యాసాన్ని ప్రదర్శిస్తున్నప్పుడు ఊహించని విధంగా పట్టు తప్పిన 19 ఏళ్ల లాంగ్‌టన్, సుమారు మూడు మీటర్ల ఎత్తు నుండి తల, మెడ భాగం నేలను బలంగా తాకేలా పడిపోయాడు. ఈ ప్రమాదానికి సంబంధించిన వీడియో ప్రస్తుతం సోషల్ మీడియాలో వేగంగా వైరల్ అవుతోంది.

ఈ విషాదకర సంఘటన తర్వాత పోటీని వెంటనే నిలిపివేసారు, అలాగే స్టేడియం అంతా ఒక్క నిమిషం పాటు నిశ్శబ్దం ఆవరించింది. వెంటనే అప్రమత్తమైన దాదాపు పది మందికి పైగా వైద్య బృందం సభ్యులు మైదానంలోకి పరుగులు తీసి లాంగ్‌టన్‌కు అత్యవసర ప్రథమ చికిత్స అందించారు. సుదీర్ఘ వైద్య పరీక్షల అనంతరం, అతనికి నెక్ బ్రేస్ అమర్చి, స్ట్రెచర్ మీద ఉంచి, స్టేడియంలో ఉన్న అభిమానులందరి నిలబడిన చప్పట్ల మధ్య ఆసుపత్రికి తరలించారు. అతను స్పృహలోనే ఉన్నాడని, తన చేతులు, కాళ్లను కదుపుతున్నాడని, వైద్యులతో మాట్లాడుతున్నాడని జట్టు యాజమాన్యం తరువాత అధికారికంగా ధృవీకరించింది.

ఈ ప్రమాదం జరగడం వల్ల, అదే రోజు కెనడా జట్టు జిమ్నాస్టిక్స్ చరిత్రలో ఒక కొత్త మైలురాయిని చేరుకున్న ఘటన కాస్త మరుగున పడింది. దిగ్గజ క్రీడాకారుడు ఫెలిక్స్ డోల్చీ నాయకత్వంలో బరిలోకి దిగిన కెనడా జట్టు, 241.400 పాయింట్లు సాధించి గత 20 ఏళ్లలో లేని విధంగా బంగారు పతకాన్ని సొంతం చేసుకుని ఇంగ్లాండ్ ఆధిపత్యానికి తెరదించింది. ఇంగ్లాండ్ జట్టు 238.200 పాయింట్లతో రజత పతకాన్ని, హోరాహోరీ పోటీ తర్వాత ఆస్ట్రేలియా కాంస్య పతకాన్ని కైవసం చేసుకున్నాయి. గమనించదగ్గ విషయమేమిటంటే, ఆరుసార్లు ఒలింపిక్ పతక విజేత అయిన మాక్స్ విట్‌లాక్ గాయపడటంతో, అతని స్థానంలో జట్టులోకి వచ్చినవారే ఈ గ్యాబ్రియేల్ లాంగ్‌టన్.

తోటి క్రీడాకారుడి ప్రమాదంతో మానసికంగా తీవ్రంగా కలత చెందినప్పటికీ కోలుకున్న ఇంగ్లాండ్ జట్టు సభ్యులు, మనస్సును ఏకాగ్రత వైపు మళ్లించి మళ్లీ పోటీని కొనసాగించారు. లాంగ్‌టన్ తర్వాత హై బార్‌లోకి దిగిన ల్యూక్ వైట్‌హౌస్, తోటి క్రీడాకారుడి ప్రమాదాన్ని కళ్లారా చూసిన తర్వాత పోటీని కొనసాగించడం ఎంతటి మానసిక సవాలుతో కూడుకున్నదో పంచుకున్నాడు. ఇదిలా ఉండగా, కెనడాకు చెందిన ఫెలిక్స్ డోల్చీ మరియు స్కాట్లాండ్‌కు చెందిన హమీష్ కార్టర్ సహా వివిధ దేశాల జిమ్నాస్టిక్స్ క్రీడాకారులు లాంగ్‌టన్ త్వరగా కోలుకోవాలని కోరుకుంటూ తమ మానవత్వాన్ని చాటుకున్నారు. ఇంగ్లాండ్ జట్టు కూడా వెంటనే ప్రకటన విడుదల చేసి, వేగంగా స్పందించిన వైద్య బృందానికి కృతజ్ఞతలు తెలిపింది.