గుండెలవిసేలా రోదించిన 7 ఏళ్ల కుమారుడు.. నలుగురి ముందే యువతిపై విచక్షణారహితంగా కత్తితో దాడి చేసి చంపిన కామాంధుడు.. వెన్నులో వణుకు పుట్టించే ఘటన.!!

అమెరికాలోని న్యూయార్క్, బ్రూక్లిన్ (Brooklyn) పరిధిలోని లింకన్ టెర్రస్ పార్కులో షకీమా డేవిస్ (30) అనే మహిళ.. తన ఏడేళ్ల కుమారుడు, స్నేహితులతో కలిసి బార్బెక్యూ పార్టీ చేసుకుంటుండగా అత్యంత కిరాతకంగా హత్యకు గురైంది.

గతంలో షకీమాతో ఒక్కసారి మాత్రమే పరిచయం ఉన్నట్లు చెప్పబడుతున్న ఒక వ్యక్తి అక్కడికి వచ్చి, తనతో లైంగిక సంబంధం పెట్టుకోవాలంటూ ఆమెను తీవ్రంగా వేధించాడు. అతని అసభ్య ప్రతిపాదనను షకీమా నిర్ద్వంద్వంగా తిరస్కరించడంతో ఇద్దరి మధ్య తీవ్ర వాగ్వాదం చెలరేగింది. ఒకానొక దశలో ఆగ్రహానికి గురైన షకీమా తన చేతిలో ఉన్న డ్రింక్‌ను అతనిపై విసిరింది. దీంతో గొడవ మరింత ముదరడంతో, ఆత్మరక్షణ కోసం షకీమా పక్కనే ఉన్న బార్బెక్యూ గ్రిల్ రాడ్‌ను తీసుకోగా.. ఆ దుండగుడు తన వద్ద ఉన్న కత్తితో ఆమె తల, శరీరంపై విచక్షణారహితంగా దాడి చేసి పొడిచాడు.

రక్తపు మడుగులో కుప్పకూలిన షకీమాను వెంటనే ఆసుపత్రికి తరలించినప్పటికీ, ఆమె అప్పటికే మృతి చెందినట్లు వైద్యులు ధ్రువీకరించారు. దాదాపు 10 నుంచి 15 మంది ప్రత్యక్ష సాక్షుల ముందే, మరీ ముఖ్యంగా ఆమె 7 ఏళ్ల చిన్నారి కొడుకు కళ్లెదుటే ఈ దారుణ కాండ జరగడం తీవ్ర దిగ్భ్రాంతికి గురిచేసింది. తన కన్నబిడ్డ ముందే తల్లిని ఇంత కిరాతకంగా చంపడాన్ని ఎట్టిపరిస్థితుల్లోనూ జీర్ణించుకోలేకపోతున్నామని ఆమె స్నేహితురాలు కన్నీటిపర్యంతమైంది. ఆ దుండగుడితో తన కుమార్తె గతంలో కేవలం ఒక్కసారి మాత్రమే బయటకు వెళ్లిందని, అతని ప్రవర్తన నచ్చకపోవడంతో దూరంగా ఉంటోందని తనతో చెప్పినట్లు షకీమా తల్లి ఆద్రా పెగ్యూస్ (60) పేర్కొన్నారు. ఘటనా స్థలం నుంచి పరారైన ఆ హంతకుడి కోసం పోలీసులు ముమ్మరంగా గాలిస్తున్నారు. నిందితుడి ఫోటోను విడుదల చేసి, అతడిని పట్టుకునేందుకు ప్రజల సహాయాన్ని కోరారు.