ఆపిల్, మైక్రోసాఫ్ట్ మరియు గూగుల్ వంటి అమెరికన్ కంపెనీలకు ఇరాన్ ఇచ్చిన హెచ్చరికలను అధ్యక్షుడు డొనాల్డ్ ట్రంప్ మంగళవారం ఎగతాళి చేశారు. ఇరాన్ ఈ టెక్ దిగ్గజాలను దేనితో బెదిరిస్తోంది – “బీబీ గన్లతోనా (చిన్నపాటి ఎయిర్ గన్‌లు)?” అని ఆయన ప్రశ్నించారు.
ఇరాన్ సైనిక విభాగం ‘ఇస్లామిక్ రివల్యూషనరీ గార్డ్ కార్ప్స్’ (IRGC) మంగళవారం ఒక ప్రకటన చేస్తూ.. ఏప్రిల్ 1 నుండి పశ్చిమ ఆసియా/గల్ఫ్ ప్రాంతంలోని అమెరికన్ కంపెనీలే లక్ష్యంగా దాడులు చేస్తామని హెచ్చరించింది. ఇరాన్ నాయకులపై ‘టార్గెటెడ్ అస్సాసినేషన్లు’ (లక్షిత హత్యలు) కొనసాగితే ఈ చర్యలు ఉంటాయని పేర్కొంది. IRGC జాబితాలో మైక్రోసాఫ్ట్, గూగుల్, ఆపిల్, ఇంటెల్, ఐబీఎం, టెస్లా మరియు బోయింగ్ వంటి 18 ప్రముఖ కంపెనీలు ఉన్నాయి.
ట్రంప్ ‘బీబీ గన్స్’ వ్యాఖ్యలు
వైట్ హౌస్‌లో విలేకరులతో మాట్లాడుతున్నప్పుడు, “ఈరోజు ఇరాన్ ప్రభుత్వం ఈ ప్రాంతంలోని పలు అమెరికన్ కంపెనీలను బెదిరించింది” అని ఒక విలేకరి అడిగిన ప్రశ్నకు ట్రంప్ ఎగతాళిగా స్పందించారు. “దేనితో? వారు దేనితో బెదిరించారు? బీబీ గన్లతోనా? వారి దగ్గర బెదిరించడానికి ఏమీ మిగిలి లేదు” అని ట్రంప్ అన్నారు.
విలేకరి తన ప్రశ్నను పునరావృతం చేయగా, ట్రంప్ అడ్డుకుంటూ.. “నువ్వు ఒక ప్రకటన చేస్తున్నావు. వారు దేనితో బెదిరించారో చెప్పు? నాకు తెలియదు, నువ్వే చెప్పు. వారు ఎలా బెదిరించారు?” అని నిలదీశారు. ఇరాన్ కేవలం బెదిరించిందని మాత్రమే తనకు తెలుసని విలేకరి చెప్పగా.. “దాని అర్థం ఏంటి? వారు ఏదైనా అసభ్యంగా అన్నారా?” అని ట్రంప్ ప్రశ్నించారు.
“నువ్వు కనీసం ఆ ముప్పు ఏంటో కూడా చెప్పలేకపోతున్నావు. వారు ఆ కంపెనీలను పేల్చివేస్తామని అన్నారా?” అని ట్రంప్ అసహనం వ్యక్తం చేశారు. ఫిబ్రవరి 28న ఇజ్రాయెల్‌తో కలిసి ఇరాన్ అణు స్థావరాలపై అమెరికా జరిపిన దాడుల నేపథ్యంలో ట్రంప్ ఈ వ్యాఖ్యలు చేశారు. “వారు కచ్చితంగా అణు ఆయుధాలతో దాడి చేయలేరు” అని ఆయన ధీమా వ్యక్తం చేశారు.
ఇరాన్ హిట్ లిస్ట్‌లో ఆపిల్, మైక్రోసాఫ్ట్, గూగుల్
ఇరాన్ లో జరిగే ప్రతి ఉగ్రవాద చర్యకు బదులుగా అమెరికన్ కంపెనీల యూనిట్లను ధ్వంసం చేస్తామని IRGC మంగళవారం హెచ్చరించింది. “బుధవారం, ఏప్రిల్ 1, టెహ్రాన్ సమయం రాత్రి 8 గంటల నుండి (భారత కాలమానం ప్రకారం రాత్రి 10:30 గంటలకు) ఈ దాడులు ప్రారంభమవుతాయి. ఉద్యోగులు తమ ప్రాణాలను కాపాడుకోవడానికి వెంటనే కార్యాలయాలను విడిచి వెళ్లాలని మేము కోరుతున్నాము” అని ప్రకటనలో పేర్కొన్నారు.
ఈ హిట్ లిస్ట్‌లో డెల్, మైక్రోసాఫ్ట్, హెచ్‌పి, సిస్కో, ఇంటెల్, ఒరాకిల్, ఆపిల్, మెటా (ఫేస్‌బుక్, వాట్సాప్), ఐబీఎం, జేపీ మోర్గాన్ చేజ్, టెస్లా, జనరల్ ఎలక్ట్రిక్ మరియు బోయింగ్ వంటి సంస్థలు ఉన్నాయి. దుబాయ్ మరియు అబుదాబి వంటి నగరాల్లో ఈ కంపెనీలకు భారీ కార్యాలయాలు, రిటైల్ అవుట్‌లెట్లు ఉన్నాయి.