రాజస్థాన్‌లోని అజ్మీర్‌లో స్కూటర్‌పై ఇంటికి వెళ్తున్న రిటైర్డ్ వైద్యుడు, ఆయన భార్యను బైక్‌పై వచ్చిన ఇద్దరు దుండగులు అడ్డుకుని నగలు దోచుకున్న ఘటన తీవ్ర కలకలం రేపింది.
వైశాలి నగర్ నుంచి సివిల్ లైన్స్ ప్రాంతంలోని తమ ఇంటికి ఆ దంపతులు వెళ్తున్నారు. ఆ సమయంలో వెనుక నుంచి బైక్‌పై వచ్చిన గుర్తుతెలియని వ్యక్తులు, ఆ మహిళ మెడలోని బంగారు గొలుసును లాక్కోవడానికి ప్రయత్నించారు. దీంతో నియంత్రణ కోల్పోయిన దంపతులు స్కూటర్‌తో సహా రోడ్డుపై కిందపడిపోయారు.
వెంటనే కిందపడిన దొంగలు కూడా లేచి, మళ్లీ ఆ దంపతుల వద్దకు వెళ్లారు. వారిలో ఒక దొంగ నకిలీ తుపాకీని చూపించి బెదిరిస్తూ, మహిళ మెడలోని బంగారు గొలుసును లాక్కున్నాడు. బాధితులు కేకలు వేయడంతో చుట్టుపక్కల ప్రజలు ఘటనా స్థలానికి పరుగున వచ్చారు. స్థానికులు ఒక దొంగను పట్టుకోగా, మరొకడు అక్కడి నుంచి తప్పించుకుని పారిపోయాడు.
పట్టుబడిన దొంగను స్థానికులు దండించగా, సమాచారం అందుకున్న పోలీసులు అక్కడికి చేరుకుని అతడిని అదుపులోకి తీసుకుని స్టేషన్‌కు తరలించారు. ఘటనా స్థలంలో నిందితులు ఉపయోగించిన బైక్, నకిలీ తుపాకీని పోలీసులు స్వాధీనం చేసుకున్నారు. పారిపోయిన మరో నిందితుడి కోసం పోలీసులు గాలింపు ముమ్మరం చేశారు. బాధితుల ఇల్లు సంఘటన జరిగిన ప్రదేశానికి కేవలం 100 మీటర్ల దూరంలోనే ఉన్నట్లు తెలిసింది.
ఈ ఘటన దృశ్యాలన్నీ సమీపంలోని సీసీటీవీ కెమెరాలో రికార్డయ్యాయి. తొలుత నిందితులు గొలుసు లాగడానికి ప్రయత్నించడం, ఆపై దంపతులు కిందపడినప్పటికీ మళ్లీ వారి వద్దకు వెళ్లి నకిలీ తుపాకీతో బెదిరించి గొలుసు దోచుకోవడం అందులో స్పష్టంగా కనిపిస్తోంది. మొదటి ప్రయత్నం విఫలమై కిందపడినా కూడా ఏమాత్రం భయం లేకుండా మళ్లీ దోపిడీకి పాల్పడటం స్థానికులను విస్మయానికి గురిచేసింది. గతంలో కూడా అజ్మీర్‌లో ఒక దివ్యాంగుడిపై జరిగిన చైన్ స్నాచింగ్ ఘటన సీసీటీవీలో రికార్డవడం గమనార్హం.