రోజూ ఉదయం ఇడ్లీ, దోశల్లోకి సాంబార్ లేదా రెగ్యులర్ పప్పు పొడి తిని బోర్ కొట్టిన వారికి, ఈ వెల్లుల్లి పొడి ఒక అద్భుతమైన ప్రత్యామ్నాయం.
వెల్లుల్లి జీర్ణక్రియకు సహాయపడటమే కాకుండా, శరీరంలోని గ్యాస్ సమస్యలను తొలగించడంలో గ్రేట్ గా పనిచేస్తుంది. ఉదయం నిద్రలేవగానే గ్యాస్ సమస్యతో ఇబ్బంది పడేవారు, ఈ వెల్లుల్లి పొడిని ఆహారంలో చేర్చుకోవడం వల్ల మంచి ఫలితం ఉంటుంది. రుచిలోనూ, సువాసనలోనూ ప్రత్యేకంగా ఉండే ఈ పొడిని ఇంట్లోనే సులభంగా తయారు చేసుకోవచ్చు.
కావలసిన పదార్థాలు:
- వెల్లుల్లి – 200 గ్రాములు
- మినపప్పు – 1 కప్పు
- ఎండు మిర్చి (రుచికి సరిపడా)
- కాశ్మీరీ ఎండు మిర్చి (రంగు కోసం)
- కరివేపాకు – గుప్పెడు
- పచ్చి కొబ్బరి తురుము – 1 కప్పు
- ఇంగువ – 1 టీస్పూన్
- ఉప్పు – తగినంత
- నూనె – కొద్దిగా
తయారీ విధానం:
- ముందుగా 200 గ్రాముల వెల్లుల్లిని పొట్టు తీయకుండా రోట్లో వేసి కచ్చా పచ్చాగా దంచుకోవాలి (మిక్సీలో అయితే ఒక్కసారి పల్స్ చేయండి).
- బాణలిలో ఒక టీస్పూన్ నూనె వేసి, ఒక కప్పు మినపప్పును దోరగా వేయించి పక్కన పెట్టుకోవాలి.
- అదే బాణలిలో ఎండు మిర్చి, కాశ్మీరీ మిర్చిని కూడా వేయించి తీసుకోవాలి.
- తర్వాత కరివేపాకును కరకరలాడేలా వేయించాలి.
- ఇప్పుడు దంచి పెట్టుకున్న వెల్లుల్లిని వేసి అది బంగారు రంగులోకి వచ్చే వరకు బాగా వేయించాలి.
- అందులోనే కొబ్బరి తురుమును కూడా వేసి, తేమ పోయి ఎర్రగా అయ్యే వరకు వేయించి చల్లార్చుకోవాలి.
- వేయించిన పదార్థాలన్నీ చల్లారిన తర్వాత మిక్సీ జార్‌లో వేసి, తగినంత ఉప్పు, ఇంగువ కలిపి మెత్తగా కాకుండా కొంచెం బరకగా (కమ్మని సువాసన వచ్చేలా) గ్రైండ్ చేసుకోవాలి.
అంతే! ఆరోగ్యకరమైన వెల్లుల్లి పొడి సిద్ధం. దీనిని వేడి వేడి ఇడ్లీ లేదా దోశల్లోకి నువ్వుల నూనె లేదా నెయ్యితో తింటే చాలా అద్భుతంగా ఉంటుంది.