మైసూర్: కర్ణాటకలోని మైసూర్ జిల్లాలో అత్యంత విషాదకరమైన, కలకలం రేపే సంఘటన ఒకటి వెలుగులోకి వచ్చింది. పెళ్లికి కేవలం మూడు రోజుల ముందు కాబోయే వధువుతో పాటు ఆమె తల్లిదండ్రులు బలవన్మరణానికి పాల్పడ్డారు. లభించిన సమాచారం ప్రకారం.. ఇంట్లో పెళ్లి పనులు ముమ్మరంగా సాగుతున్నాయి, బంధువుల రాకతో ఇల్లంతా సందడిగా ఉంది. ఈ తరుణంలో ఒక ఉన్మాది.. కాబోయే వరుడికి సదరు యువతికి సంబంధించిన కొన్ని వ్యక్తిగత (ప్రైవేట్) ఫోటోలను మొబైల్కు పంపాడు.
యువతి ప్రైవేట్ ఫోటోలు అందడంతో.. పెళ్లి పీటలు ఎక్కాల్సిన ఆ ఇంట్లో ఒక్కసారిగా వివాదం రేగింది. కాబోయే భర్త కూడా యువతితో గొడవకు దిగాడు. ఈ అవమానాన్ని తట్టుకోలేక, పెళ్లి ఆగిపోతుందనే తీవ్ర మానసిక ఆందోళనతో గతనెల సోమవారం ఆ యువతి, ఆమె తల్లిదండ్రులు ఇంట్లోనే బలవన్మరణానికి శరణు జొచ్చారు.
ఏకపక్షంగా ప్రేమించిన ఉల్లాస్ గౌడ – ప్రపోజల్ తిరస్కరణే కారణం:
పోలీసుల కథనం ప్రకారం.. ఉల్లాస్ గౌడ అనే యువకుడు సదరు యువతిని ఏకపక్షంగా ఇష్టపడ్డాడు. గతంలో ఆమెకు పెళ్లి ప్రపోజల్ కూడా పెట్టాడు. యువతి నిరాకరించడంతో ఆమెను నిరంతరం వేధింపులకు గురిచేసేవాడు. అంతటితో ఆగకుండా, ఆమె తల్లిదండ్రులపై కూడా ఒత్తిడి తెచ్చాడు. అయితే, యువతి కుటుంబ సభ్యులు అతడి ప్రపోజల్ను ఖచ్చితంగా తిరస్కరించారు.
దీంతో కక్ష పెంచుకున్న ఉల్లాస్.. ఆమెకు వేరే వ్యక్తితో నిశ్చితార్థం జరిగి జూన్ 24న వివాహం నిశ్చయమవడాన్ని తట్టుకోలేకపోయాడు. జూన్ 21 రాత్రి, యువతి తల్లిదండ్రులు ఉల్లాస్ను, అతడి తల్లిదండ్రులను తమ ఇంటికి పిలిపించి నచ్చజెప్పే ప్రయత్నం చేశారు. అలాగే అతడి మొబైల్లో ఉన్న యువతికి సంబంధించిన కొన్ని ప్రైవేట్ ఫోటోలు, మెసేజ్లను అక్కడికక్కడే డిలీట్ చేయించారు.
రహస్యంగా ఫోటోలు దాచి.. వరుడికి పంపి రచ్చ:
అయితే, ఉల్లాస్ అప్పటికే కొన్ని ఫోటోలను తన వద్ద రహస్యంగా దాచుకున్నాడు. యువతి ఇంటి నుండి తిరిగి వచ్చిన వెంటనే, ఆ ఫోటోలను కాబోయే వరుడి మొబైల్కు వాట్సాప్ చేశాడు. దీంతో ఆగ్రహానికి గురైన వరుడి కుటుంబ సభ్యులు వెంటనే వధువు ఇంటికి చేరుకున్నారు. ఇరు కుటుంబాల మధ్య గొడవ పెద్దదై, సంబంధం తెగిపోయే పరిస్థితికి వచ్చింది.
ఎంతో వైభవంగా జరగాల్సిన పెళ్లి.. ఈ దుర్మార్గుడి వల్ల ఇలా రచ్చకెక్కడం, సమాజంలో తలెత్తుకోలేమనే తీవ్ర అవమానభారంతో ఆ యువతి, ఆమె తల్లి మరియు తండ్రి ముగ్గురూ కలిసి ఇంట్లోనే విషం తీసుకున్నారు.
సూసైడ్ నోట్ లభ్యం – నిందితుడు పరారీ:
ఘటనా స్థలానికి చేరుకున్న పోలీసులు మృతదేహాలను స్వాధీనం చేసుకున్నారు. విచారణలో ఆ కుటుంబం రాసిన ఒక ఆత్మహత్య లేఖ (సూసైడ్ నోట్) లభ్యమైంది. అందులో తమ చావుకు ఉల్లాస్ గౌడనే పూర్తి కారణమని వారు స్పష్టంగా పేర్కొన్నారు. బాధితుల సూసైడ్ నోట్ ఆధారంగా పోలీసులు ఉల్లాస్పై ఆత్మహత్యకు ప్రేరేపించినందుకు (Abetment to Suicide) కేసు నమోదు చేశారు. ఘటన జరిగినప్పటి నుండి నిందితుడు పరారీలో ఉన్నాడు. నిందితుడిని పట్టుకునేందుకు పోలీసులు ప్రత్యేక బృందాలను రంగంలోకి దించి గాలింపు చర్యలు ముమ్మరం చేశారు.