హరిద్వార్ : ఉత్తరాఖండ్ రాష్ట్రం హరిద్వార్ జిల్లాలోని మంగ్లూర్ పరిధిలో గల లంఢోరాలో దైవంగా భావించే వైద్య వృత్తికే మచ్చ తెచ్చే ఘటన వెలుగులోకి వచ్చింది. ఇక్కడి ‘లోక్ నాయక్’ అనే ప్రైవేట్ ఆసుపత్రిలో చికిత్స పొందుతున్న ఒక మహిళ పట్ల డాక్టర్ రిజ్వాన్ అత్యంత హేయంగా, అసభ్యంగా ప్రవర్తించాడు.
బాధితురాలు ఈ విషయాన్ని తన కుటుంబ సభ్యులకు తెలపడంతో ఆసుపత్రి వద్ద తీవ్ర ఉద్రిక్తత నెలకొంది. పరిస్థితిని గమనించిన డాక్టర్ రిజ్వాన్ మరియు ఆసుపత్రి సిబ్బంది వెంటనే ఆసుపత్రికి తాళం వేసి అక్కడి నుండి పరారయ్యారు. బాధితురాలి ఫిర్యాదు మేరకు పోలీసులు కేసు నమోదు చేసి, ఆదివారం రాత్రి నిందితుడైన డాక్టర్ రిజ్వాన్‌ను అరెస్ట్ చేశారు.
ఘటన వివరాలు: లంఢోరా ప్రాంతానికి చెందిన సదరు మహిళకు ఆరు నెలల క్రితమే వివాహం జరిగింది. ఆమె తన భర్తతో కలిసి పుట్టింటికి వచ్చిన సమయంలో, జనవరి 31న అకస్మాత్తుగా అనారోగ్యానికి గురైంది. దీంతో ఆమెను స్థానిక లోక్ నాయక్ ఆసుపత్రిలో చేర్పించారు. డాక్టర్ రిజ్వాన్ తరచూ తనిఖీల నెపంతో ఆమె వద్దకు వస్తుండేవాడు. ఈ క్రమంలో మహిళ భర్తను పండ్లు తీసుకురావాలని బయటకు పంపి, ఆమె ఒంటరిగా ఉన్న సమయం చూసి అసభ్యకరంగా తాకుతూ లైంగిక వేధింపులకు పాల్పడ్డాడు.
భర్త తిరిగి రాగానే బాధితురాలు జరిగిన దారుణాన్ని వివరించింది. వెంటనే ఆమె బంధువులు ఆసుపత్రికి చేరుకుని నిరసన తెలిపారు. బాధితుల ఫిర్యాదును తీవ్రంగా పరిగణించిన పోలీసులు నిందితుడిని అదుపులోకి తీసుకున్నారు. ప్రస్తుతం ఈ కేసుపై పోలీసులు లోతైన విచారణ జరుపుతున్నారని ఎస్పీ దేహత్ శేఖర్ చంద్ర సుయాల్ తెలిపారు.