మధ్యప్రదేశ్ రాష్ట్రం జబల్‌పూర్‌లో చికెన్ ధర విషయమై తలెత్తిన వివాదం ఓ హత్యకు దారితీసింది. డీ-మార్ట్ సమీపంలోని ఓ చికెన్ షాపులో ఈ ఘటన జరిగినట్లు తెలుస్తోంది.
చికెన్ ధరపై విద్యార్థి అర్జున్ సింగ్, దుకాణదారుడు సికందర్ మధ్య వాగ్వాదం చోటుచేసుకుంది. ఆ తర్వాత వాగ్వాదం ముదరడంతో, దుకాణదారుడు మరియు అతనితో ఉన్న కొందరు వ్యక్తులు అర్జున్ సింగ్‌పై దాడి చేసినట్లు పోలీసులకు ఫిర్యాదు అందింది. లాఠీలతో తీవ్రంగా దాడి చేయడంతో అర్జున్ సింగ్ బలమైన గాయాలతో కిందపడిపోయినట్లు సమాచారం.
ఉత్తరప్రదేశ్‌కు చెందిన అర్జున్ సింగ్, జబల్‌పూర్‌లో అద్దె ఇంట్లో ఉంటూ పోటీ పరీక్షలకు సిద్ధమవుతున్నాడు. అతని 33 ఏళ్ల బావ రూపేంద్ర సింగ్ భారత సైన్యంలో నాయక్ హోదాలో పనిచేస్తున్నాడు. చాలా రోజుల తర్వాత వీరిద్దరూ కలుసుకుని, కలిసి చికెన్ కొనుక్కుని తినేందుకు తిలహరి ప్రాంతంలోని ఓ దుకాణానికి వెళ్లారు. ఆ సమయంలో చికెన్ ధర విషయమై అర్జున్‌కు, దుకాణదారుడికి మధ్య జరిగిన చర్చ అకస్మాత్తుగా ఘర్షణకు దారితీసినట్లు తెలుస్తోంది.
దీంతో దుకాణదారుడు సికందర్ తన అనుచరులు కొందరిని అక్కడికి పిలిపించాడని, వారు అర్జున్, అతని బావను చుట్టుముట్టారని పోలీసులు మరియు ప్రత్యక్ష సాక్షులు తెలిపారు. అనంతరం అర్జున్ సింగ్‌పై లాఠీలతో విచక్షణారహితంగా దాడి చేయడంతో అతని తల, శరీరంపై తీవ్ర గాయాలయ్యాయి. ఆ తర్వాత అతన్ని కంధారి మురుగు కాల్వ వంతెన వద్దకు లాక్కెళ్లి ఆ కాల్వలో పడేశారనే ఆరోపణలు వస్తున్నాయి. సమాచారం అందుకున్న వెంటనే ఘటనా స్థలానికి చేరుకున్న గోరాబజార్ పోలీసులు, స్థానికుల సహాయంతో కాల్వలో పడి ఉన్న అర్జున్‌ను బయటకు తీసి ఆసుపత్రికి తరలించారు.
అయితే, ఆసుపత్రిలో చికిత్స పొందుతూ పరిస్థితి విషమించి అర్జున్ సింగ్ ప్రాణాలు కోల్పోయాడు. దీంతో అతని కుటుంబ సభ్యులు, స్థానికులు తీవ్ర దిగ్భ్రాంతికి గురై, నిందితులపై కఠిన చర్యలు తీసుకోవాలని డిమాండ్ చేశారు. ఈ కేసులో ప్రధాన నిందితుడైన సికందర్‌తో సహా నలుగురిని పోలీసులు అదుపులోకి తీసుకుని విచారిస్తున్నారు. అర్జున్ మృతదేహాన్ని పోస్టుమార్టం నిమిత్తం పంపించారు. చికెన్ ధర విషయమై మొదలైన వాగ్వాదం ఇంతటి హింసకు ఎలా దారితీసింది, మురుగు కాల్వలో పడేసిన ఘటనలో ఇంకా ఎవరెవరి ప్రమేయం ఉందనే కోణంలో పోలీసులు ముమ్మర దర్యాప్తు కొనసాగిస్తున్నారు.
Leave a Reply