మధ్యప్రాచ్య దేశాల్లో యుద్ధ మేఘాలు కమ్ముకుంటున్న వేళ, జూన్ 3న కువైట్ అంతర్జాతీయ విమానాశ్రయం (టెర్మినల్ 1) పై జరిగిన భయంకరమైన డ్రోన్ దాడికి సంబంధించిన సీసీటీవీ దృశ్యాలు ప్రపంచాన్ని షాక్కు గురిచేశాయి.
ఈ ఇరాన్ డ్రోన్ దాడిలో ఒక భారతీయ వ్యక్తి అక్కడికక్కడే దుర్మరణం చెందారు. అంతేకాకుండా, మరో 60 మందికి పైగా తీవ్రంగా గాయపడి రక్తపు మడుగులో పడిపోయారు. కువైట్ సివిల్ ఏవియేషన్ డైరెక్టరేట్ విడుదల చేసిన ఈ వీడియోలో, దాడి జరిగిన క్షణాలు, ఆ తర్వాత విమానాశ్రయం మొత్తం పొగమయంగా మారి ప్రజలు ప్రాణభయంతో పరుగులు తీస్తున్న హృదయవిదారక దృశ్యాలు రికార్డయ్యాయి.
అమెరికా జరిపిన దాడికి ప్రతీకారంగానే ఇరాన్ ఈ దాడికి పాల్పడిందని అమెరికాకు చెందిన ‘సెంట్-కామ్’ (CENTCOM) మరియు కువైట్ రక్షణ శాఖ ఆరోపిస్తున్నాయి. అయితే, “ఈ దాడితో మాకు సంబంధం లేదు, అమెరికాకు చెందిన క్షిపణి వ్యవస్థ విఫలం కావడం వల్లే ఈ ప్రమాదం జరిగింది” అని ఇరాన్ ఆరోపణలను తోసిపుచ్చింది.
ఈ ఘటనతో తీవ్ర ఆగ్రహం వ్యక్తం చేసిన కువైట్ ప్రభుత్వం, ఇద్దరు ఇరాన్ దౌత్యవేత్తలను 24 గంటల్లో దేశం విడిచి వెళ్లాలని ఆదేశించింది. ఈ పరిణామాలతో గల్ఫ్ ప్రాంతంలో యుద్ధ వాతావరణం నెలకొంది.