బీజింగ్: విద్యార్థులను అలరించడానికి ఏర్పాటు చేసిన పాఠశాల క్రీడా దినోత్సవం ఊహించని మలుపు తీసుకుంది. రోబో ప్రదర్శన అదుపు తప్పడంతో అక్కడి వారంతా ఆశ్చర్యానికి గురయ్యారు.
వాయువ్య చైనాలోని జిన్జియాంగ్ ఉయ్ఘర్ అటానమస్ రీజియన్లోని ఒక పాఠశాలలో జరిగిన ఈ ఘటనకు సంబంధించిన షాకింగ్ వీడియో వెలుగులోకి వచ్చింది. వీడియో ప్రారంభంలో, ఆ రోబో మైదానంలో డ్యాన్స్ చేస్తూ, మార్షల్ ఆర్ట్స్ కిక్స్ (martial arts kicks) ఇస్తూ ప్రేక్షకులను ఆకట్టుకుంది. అయితే, విద్యార్థులు రోబోతో కలిసి డ్యాన్స్ చేయడానికి మైదానంలోకి వచ్చినప్పుడు అసలు సమస్య మొదలైందని డైలీ మెయిల్ నివేదించింది.
అసలేం జరిగింది?
ప్రదర్శన మొదలైన కొద్దిసేపటికే, ఆ రోబో అదుపు తప్పి కింద పడిపోయింది. చుట్టూ ఎక్కువ మంది వ్యక్తులు ఉండటంతో రోబో సెన్సార్లలో గందరగోళం ఏర్పడిందని, దానివల్ల అది తడబడి కింద పడిందని సమాచారం. ఆ తర్వాత అది లేచి అక్కడున్న విద్యార్థులపై కుంగ్-ఫూ కిక్స్తో విరుచుకుపడటం మొదలుపెట్టింది.
ఆ రోబో అస్థిరంగా కదులుతూ విద్యార్థుల వైపు కిక్స్ విసరడంతో, వారు ఒక్కసారిగా కంగారుపడి వెనక్కి తగ్గారు. ఆ రోబో అదుపు లేకుండా కదులుతుండటంతో మైదానంలో కాసేపు ఆందోళన నెలకొంది. వెంటనే రోబో హ్యాండ్లర్ (Handler) రంగంలోకి దిగి, ఎవరికీ ఎటువంటి ప్రమాదం జరగకముందే ఆ రోబోను చేతులతో పైకి ఎత్తి పక్కకు తీసుకువెళ్లడంతో పరిస్థితి సద్దుమణిగింది.
ఈ ఘటనలో విద్యార్థులెవరికీ గాయాలు కాలేదని డైలీ మెయిల్ తెలిపింది.