కోర్బా: ఛత్తీస్గఢ్లోని కోర్బా జిల్లాలో చోటుచేసుకున్న ఒక భయంకరమైన ఘటన స్థానికులను దిగ్భ్రాంతికి గురిచేసింది. ఒక 58 ఏళ్ల వ్యక్తి కుటుంబ తగాదా కారణంగా తన భార్యను గొడ్డలితో నరికి చంపి, తెగిపడిన తలతో గ్రామంలో తిరిగాడు.
బుధవారం సాయంత్రం రాజ్గమార్ పోలీస్ అవుట్పోస్ట్ పరిధిలోని బుందేలి గ్రామంలో ఈ ఘటన జరిగింది. నిందితుడు ఏమాత్రం పశ్చాత్తాపం లేకుండా ప్రవర్తించడం చూసి గ్రామస్థులు హడలిపోయారు.
హత్యకు దారితీసిన వివాదం: పోలీసుల సమాచారం ప్రకారం.. నిందితుడిని సాలిక్ రామ్ యాదవ్గా గుర్తించారు. ఇతడు స్థానిక కోళ్ల ఫారమ్లో వాచ్మెన్గా పనిచేస్తున్నాడు. హత్య జరిగిన సమయంలో సాలిక్ రామ్ మద్యం మత్తులో ఉన్నాడని, తన 50 ఏళ్ల భార్యతో గొడవ పడ్డాడని పోలీసులు తెలిపారు. ఆ గొడవలో తీవ్ర ఆగ్రహానికి లోనైన నిందితుడు, మాంసం కోసే పదునైన ఆయుధంతో ఆమెపై దాడి చేసి అక్కడికక్కడే తల నరికి చంపేశాడు.
దిగ్భ్రాంతి చెందిన గ్రామస్థులు: హత్య చేసిన అనంతరం సాలిక్ రామ్ తన భార్య తెగిపడిన తల ఒక చేత్తో, ఆయుధాన్ని మరో చేత్తో పట్టుకుని గ్రామంలో అటు ఇటు తిరుగుతూ కనిపించాడు. ఆ తర్వాత తలను, ఆయుధాన్ని ఒక ప్లాస్టిక్ సంచిలో వేసి రాజ్గమార్ పోలీస్ అవుట్పోస్ట్కు నడుచుకుంటూ వెళ్లి పోలీసులకు లొంగిపోయాడు.
నేరం వెనుక కారణం: పోలీసుల విచారణలో నిందితుడు తన నేరాన్ని అంగీకరించాడు. తన భార్య తన ప్రవర్తనను పదేపదే అనుమానిస్తుండటంతో తరచూ గొడవలు జరుగుతుండేవని చెప్పాడు. ఈ దంపతులు గత మూడేళ్లుగా కోళ్ల ఫారమ్లో పనిచేస్తున్నారు. వీరు కోర్బా బ్లాక్లోని అజ్గర్బహర్ హల్దీమాడ గ్రామానికి చెందినవారు.
ఈ దంపతులకు నలుగురు పిల్లలు ఉన్నారు. పోలీసులు నిందితుడిని అరెస్ట్ చేసి, హత్యకు ఉపయోగించిన ఆయుధాన్ని స్వాధీనం చేసుకున్నారు. మహిళ మృతదేహాన్ని పోస్టుమార్టం నిమిత్తం ఆసుపత్రికి తరలించారు. ప్రస్తుతం ఈ కేసుపై తదుపరి దర్యాప్తు కొనసాగుతోంది.