తమిళనాడు, జోలార్పేట: జోలార్పేట సమీపంలో మద్యం మత్తులో ఉన్న 17 ఏళ్ల బాలుడు కారును అదుపులేకుండా నడపడంతో ఒక మినీ వ్యాన్ మరియు నాలుగు బైకులను ఢీకొట్టి బీభత్సం సృష్టించాడు. ఈ ప్రమాదంలో ఒక పాఠశాల విద్యార్థి మృతి చెందగా, అతని తాత మరియు అక్క తీవ్రంగా గాయపడ్డారు.
ప్రమాదం ఎలా జరిగిందంటే: తిరుపత్తూరు నుండి మద్యం మత్తులో ఉన్న ఒక బాలుడు కారును వేగంగా, అదుపులేకుండా నడుపుకుంటూ జోలార్పేట జంక్షన్ బస్ స్టాండ్ వద్దకు వచ్చాడు. అదే సమయంలో, తిరుపత్తూరు సమీపంలోని కూడపట్టు ప్రాంతానికి చెందిన పెరుమాళ్ (55) తన మనవడు మౌనీష్ (11), మనవరాలు అనుష్క (17)తో కలిసి బైకుపై వస్తుండగా, వేగంగా వచ్చిన కారు వారిని నేరుగా ఢీకొట్టింది. ఈ ప్రమాదంలో ముగ్గురు గాలిలో ఎగిరిపడి తీవ్రంగా గాయపడ్డారు. కారు ఆపకుండా అతివేగంతో ముందుకు వెళ్లిపోయింది.
ఆ కారు పోలీసు స్టేషన్ రోడ్డు వైపు దూసుకెళ్లి, అక్కడ వస్తున్న ఒక మినీ వ్యాన్ మరియు మరో నాలుగు బైకులను ఒకదాని తర్వాత ఒకటి ఢీకొట్టింది. ఇది చూసిన ప్రజలు భయంతో పరుగులు తీశారు. స్థానిక యువకులు కొంతమంది ధైర్యంగా కారును వెంబడించి, జోలార్పేట మినీ స్పోర్ట్స్ స్టేడియం సమీపంలో ఆ కారును చుట్టుముట్టి ఆపారు. కారును నడుపుతోంది 17 ఏళ్ల బాలుడని తెలిసి స్థానికులు అతడికి దేహశుద్ధి చేశారు. జోలార్పేట పోలీసులు అక్కడికి చేరుకుని బాలుడిని అదుపులోకి తీసుకుని చికిత్స కోసం వాణియంబాడి ప్రభుత్వ ఆసుపత్రికి తరలించారు.
మౌనీష్ మృతి: ప్రమాదంలో తీవ్రంగా గాయపడిన తాత, మనవడు, మనవరాలిని తిరుపత్తూరు ప్రభుత్వ ఆసుపత్రికి తరలించగా, పరీక్షించిన వైద్యులు బాలుడు మౌనీష్ అప్పటికే మృతి చెందినట్లు ధృవీకరించారు. పెరుమాళ్, అనుష్కలకు ప్రస్తుతం చికిత్స అందుతోంది.
మౌనీష్ తల్లిదండ్రులు చెన్నైలో ఉంటూ పానీపూరీ దుకాణం నడుపుతున్నారు. మౌనీష్, అనుష్క తమ తాత పెరుమాళ్ సంరక్షణలో పెరుగుతున్నారు. వేసవి సెలవులు కావడంతో తల్లిదండ్రులను చూసి రావడానికి చెన్నై వెళ్లి, తిరిగి వస్తుండగా ఈ ప్రమాదం జరిగింది. రైల్వే స్టేషన్ నుండి బైకుపై ఇంటికి వెళ్తుండగా ఈ దుర్ఘటన చోటుచేసుకుంది. ఈ ఘటనకు సంబంధించిన సిసిటివి దృశ్యాలు ప్రస్తుతం సోషల్ మీడియాలో వైరల్ అవుతున్నాయి. పోలీసులు కేసు నమోదు చేసి దర్యాప్తు చేస్తున్నారు.