బెంగళూరులోని దేవనహళ్లి ప్రాంతంలో ఉన్న యాపిల్ ఐఫోన్ అసెంబ్లింగ్ యూనిట్ (ఫాక్స్కాన్ ఫ్యాక్టరీ)లో ఒక మహిళా కార్మికురాలు తాను జన్మనిచ్చిన పసికందును మరుగుదొడ్డిలోనే అత్యంత క్రూరంగా హత్య చేసిన ఘటన తీవ్ర దిగ్భ్రాంతిని కలిగించింది.
ఆంధ్రప్రదేశ్కు చెందిన రేణుక (19) అనే యువతి దేవనహళ్లిలోని ఫాక్స్కాన్ ఫ్యాక్టరీలో పని చేస్తోంది. అవివాహిత అయిన ఆమె గర్భం దాల్చిన విషయాన్ని ఎవరికీ చెప్పకుండా దాచిపెట్టింది. ఈ క్రమంలో బుధవారం నాడు ఆమెకు ప్రసవ వేదన మొదలైంది.
ఎవరూ లేని సమయంలో మరుగుదొడ్డికి వెళ్లిన ఆమె అక్కడే బిడ్డకు జన్మనిచ్చింది. పెళ్లి కాకుండా బిడ్డ పుడితే సమాజంలో అవమానం జరుగుతుందనే భయంతో ఆ చిన్నారిని చంపాలని నిర్ణయించుకుంది. బిడ్డ ఏడవకుండా ఉండటానికి నోటిని గట్టిగా నొక్కి పట్టి, ఆపై పసికందును హత్య చేసి, శరీరాన్ని ముక్కలు ముక్కలుగా నరికి మరుగుదొడ్డిలో వేసి ఫ్లష్ చేయడానికి ప్రయత్నించింది. అయితే బిడ్డ తల భాగం పైపులో చిక్కుకోవడంతో భయపడిన రేణుక ఏమీ తెలియనట్లు తిరిగి పనిలోకి వెళ్లిపోయింది.
కొంత సమయం తర్వాత మరో మహిళా కార్మికురాలు అక్కడికి వెళ్లినప్పుడు రక్తపు మరకలు, బిడ్డ శరీర భాగాలను చూసి గట్టిగా కేకలు వేసింది. వెంటనే ఫ్యాక్టరీ అధికారులు మరియు పోలీసులకు సమాచారం అందించారు. పోలీసులు జరిపిన విచారణలో సిసిటివి దృశ్యాలు మరియు రక్తపు మరకల ఆధారంగా రేణుకను గుర్తించి అరెస్ట్ చేశారు. ప్రసవ సమయంలో ఆమెకు తీవ్ర రక్తస్రావం కావడంతో ప్రస్తుతం ఆమెను చికిత్స నిమిత్తం ఆసుపత్రిలో చేర్పించారు.
గతేడాది మార్చి నెలలో కూడా ఇదే ఫాక్స్కాన్ ప్రాంగణంలోని హాస్టల్ సమీపంలో ఒక మగ శిశువు మృతదేహం మురుగునీటి ప్లాంట్లో లభ్యమైంది. ఏడాది వ్యవధిలోనే అదే ప్రాంగణంలో మళ్లీ ఇలాంటి శిశు హత్య జరగడం అధికారులు మరియు ఉద్యోగులలో ఆందోళన కలిగిస్తోంది.