చాలా మంది టీలో అల్లం, యాలకులు, పాలు, పంచదార అన్నీ వేసినా హోటల్ స్టైల్ రుచి రాదు. దానికి కారణం పదార్థాలు వేసే విధానం మరియు సమయం. చెఫ్ భరత్ తన ఇన్‌స్టాగ్రామ్ పోస్ట్‌లో పంచుకున్న ఆ రహస్యాలు ఇవే:
- అల్లాన్ని తురమవద్దు: అల్లాన్ని ఎప్పుడూ తురిమి (Grated) వేయకూడదు. అలా చేస్తే టీ చేదుగా మారుతుంది. అల్లాన్ని ఎల్లప్పుడూ కచ్చాపచ్చాగా దంచి (Crushed) వేయాలి. దీనివల్ల టీకి మంచి సువాసన, రుచి వస్తాయి.
- నీళ్లు మరిగాకే అల్లం వేయాలి: చల్లటి నీళ్లలోనే అల్లం వేయకూడదు. నీళ్లు మరగడం మొదలయ్యాక అల్లం వేస్తే ‘డిఫ్యూజన్’ (Diffusion) ప్రక్రియ ద్వారా అల్లం ఫ్లేవర్ నీటిలోకి బాగా వెళ్తుంది. దాల్చిన చెక్క, లవంగాలు కూడా ఈ దశలోనే వేయాలి.
- టీ పొడి ఎప్పుడు వేయాలి?: నీళ్లు బాగా మరుగుతున్నప్పుడే టీ పొడి వేయాలి. అప్పుడు టీ పొడిలోని రంగు, వాసన పూర్తిగా బయటకు వచ్చి టీ అద్భుతంగా ఉంటుంది.
- టీ పొడితో పాటే పంచదార: పాలు పోసిన తర్వాత పంచదార వేయడం సరైన పద్ధతి కాదు. టీ పొడి మరిగేటప్పుడే పంచదార వేయాలి. దీనివల్ల టీ చిక్కగా (Thick) మారుతుంది. పాలు పోశాక పంచదార వేస్తే పాలు పలచబడి టీ రుచి తగ్గుతుంది.
- వేడి పాలు మాత్రమే పోయాలి: టీ డికాషన్ మరిగాక అందులో చల్లటి పాలు పోయకూడదు. దీనివల్ల ‘టెంపరేచర్ షాక్’ తగిలి టీ రుచి మారిపోతుంది. అందుకే పాలను ముందే వేడి చేసి పెట్టుకుని, డికాషన్‌లో కలిపితే రుచి అద్భుతంగా ఉంటుంది.