ఇటీవల ముగిసిన తమిళనాడు అసెంబ్లీ ఎన్నికల్లో కాంగ్రెస్ 28 స్థానాల్లో పోటీ చేసి కేవలం 5 చోట్ల మాత్రమే విజయం సాధించింది.
ఈ విజయం కాంగ్రెస్ పార్టీ సొంత బలంతో రాలేదు, కేవలం డీఎంకే కూటమి వల్లే సాధ్యమైంది. నేను ఎంపీగా ఉన్న మయిలాడుదురై నియోజకవర్గం డీఎంకే కూటమికి ఉక్కుకోటగా నిలిచింది. ఇక్కడి 6 అసెంబ్లీ స్థానాల్లో 5 చోట్ల కూటమి పార్టీలు గెలిచాయి. డీఎంకే రెండు, దేముత్తిక, ఐయూఎంఎల్ మరియు కాంగ్రెస్ పార్టీలు చెరో ఒక స్థానాన్ని గెలుచుకున్నాయి. అంటే, ఇక్కడి ప్రజలు విజయ్ నేతృత్వంలోని టీవీకేకు వ్యతిరేకంగా ఓటేశారు. ప్రజల తీర్పు డీఎంకే కూటమికి అనుకూలంగా ఉందనేది స్పష్టమవుతోంది. గత 35 ఏళ్లుగా మయిలాడుదురైతో నాకు ఉన్న అనుబంధంతో ఈ మాటలను ఎంతో విచారంతో చెబుతున్నాను.
అదే సమయంలో రాష్ట్రవ్యాప్త తీర్పు మాత్రం ద్రవిడ పార్టీలైన డీఎంకే-ఏఐఏడీఎంకేలకు వ్యతిరేకంగా, విజయ్ పార్టీకి అనుకూలంగా వచ్చిందన్నది వాస్తవం. విజయ్ సెక్యులర్ వాది అని, ద్రవిడ సిద్ధాంతాలకు కట్టుబడి ఉంటారన్నది నిజం, అందులో సందేహం లేదు. కానీ, దశాబ్దాల కాలంగా నమ్మకమైన మిత్రపక్షంగా ఉన్న డీఎంకేను కాంగ్రెస్ ఇలా హఠాత్తుగా వదిలేయడం చౌకబారు అవకాశవాద రాజకీయంగా కనిపిస్తోంది.
అవకాశవాదం చాణక్య రాజనీతి కావచ్చు, కానీ అది గాంధీజీ నేర్పిన కాంగ్రెస్ నిజాయితీ రాజకీయం కాదు. మన పూర్వీకులు ఇటువంటి నీచమైన రాజకీయాన్ని అంగీకరిస్తారని నేను ఊహించలేను. జవహర్లాల్ నెహ్రూ కూడా దీనిని చూసి సందేహపడేవారు. మే 4వ తేదీ వరకు మనం ఎవరినైతే విమర్శించామో, వారి కోసం ఇన్నాళ్లు మనకు అండగా ఉన్న నమ్మకమైన మిత్రుడిని వదులుకోవడం రాజకీయంగా అర్థవంతమేనా? ఇది నీతివంతమైనదా? అసలు తెలివైన నిర్ణయమేనా?
ఈ ప్రశ్నలతో నా మనసు తల్లడిల్లుతోంది. పోటీ ముగిసిన తర్వాత గుర్రాన్ని మార్చుకునే ఈ చర్య నాలో తీవ్ర అశాంతిని కలిగిస్తోంది. గాంధీజీ నేర్పిన త్యాగం, నడవడిక కంటే తక్షణ ప్రయోజనం కోసమే మనం పాకులాడుతున్నామని అర్థమవుతోంది. ఇండియా కూటమిలో రాహుల్ గాంధీని ప్రధాని అభ్యర్థిగా ప్రకటించిన ఏకైక నాయకుడు స్టాలిన్. అటువంటి స్నేహితుడిని ఒకట్రెండు మంత్రి పదవుల కోసం వదులుకుని మన గౌరవాన్ని అమ్ముకుంటామా? అసలు మనం సురక్షితమైన ఓడలోకి చేరుతున్నామా లేక మునిగిపోయే ఓడలోకి వెళ్తున్నామా?
ఎంతటి కష్టకాలంలోనైనా డీఎంకే మనకు అండగా నిలిచింది. వారితోనే పొత్తు కొనసాగించడం ధర్మం. డీఎంకే ప్రభుత్వం గత ఐదేళ్లలో తమిళనాడును ఆసియాలోనే అత్యున్నత స్థాయికి తీసుకెళ్లింది. మనం 2029 వరకు వేచి చూసి నిర్ణయం తీసుకోవాల్సింది. కాంగ్రెస్ పోటీ చేసిన 28 స్థానాల్లో 23 చోట్ల మనల్ని టీవీకే ఓడించింది. అటువంటి పార్టీతో ఇప్పుడు చేతులు కలపడం రాజకీయంగా మూర్ఖత్వం అవుతుంది.
పైగా, దీనివల్ల వెనుక తలుపు గుండా మతతత్వ బీజేపీ లోపలికి రావడానికి అవకాశం ఇస్తే, రాజకీయ ఫుట్బాల్ చరిత్రలోనే మనం ఒక దారుణమైన ‘సేమ్ సైడ్ గోల్’ వేసుకున్న వారమవుతాం. ఇకపై మనల్ని ఎవరు నమ్ముతారు?
– మణిశంకర్ అయ్యర్, కాంగ్రెస్ సీనియర్ నాయకుడు