అమెరికా అధ్యక్షుడు డొనాల్డ్ ట్రంప్ కీలక విదేశాంగ విధానాలను ప్రకటించడానికి నిమిషాల ముందే ప్రపంచ మార్కెట్లలో కోట్లాది రూపాయల అసాధారణ లావాదేవీలు జరిగినట్లు నివేదికలు వెల్లడిస్తున్నాయి.
అధికారిక ప్రకటనలు వెలువడక ముందే జరిగిన ఈ భారీ బెట్టింగుల వెనుక ‘ఇన్సైడర్ ట్రేడింగ్’ (రహస్య సమాచారం లీక్ చేసి లాభపడటం) ఉందనే అనుమానాలు బలపడుతున్నాయి. ట్రంప్ రెండోసారి అధికారంలోకి వచ్చిన తర్వాత జరిగిన ఐదు ప్రధాన సంఘటనలను ఉదహరిస్తూ బీబీసీ ఒక సంచలన పరిశోధనాత్మక నివేదికను విడుదల చేసింది.
మార్కెట్లో మాయాజాలం: ఈ ఏడాది మార్చి 9న ఇరాన్-ఇజ్రాయెల్ ఉద్రిక్తతలపై ట్రంప్ స్పందిస్తూ.. యుద్ధం దాదాపు ముగిసిందని రాత్రి 7:16 గంటలకు సిబిఎస్ న్యూస్తో చెప్పారు. అయితే, దీనికి 47 నిమిషాల ముందే ఆయిల్ ఫ్యూచర్ మార్కెట్లో ముడిచమురు ధరలు పడిపోతాయని అంచనా వేస్తూ భారీగా పెట్టుబడులు పెట్టారు. ట్రంప్ ప్రకటన రాగానే చమురు ధరలు 25 శాతం పడిపోయాయి, దీంతో ముందుగా పెట్టుబడి పెట్టిన వారు కోట్లు సంపాదించారు. అలాగే మార్చి 23న ఇరాన్ విషయంలో ట్రంప్ తన వైఖరిని మార్చుకుంటూ సోషల్ మీడియాలో పోస్ట్ చేయడానికి 14 నిమిషాల ముందే మార్కెట్లో అసాధారణ కదలికలు కనిపించాయి.
రికార్డు స్థాయిలో ట్రేడింగ్: గత ఏప్రిల్లో ప్రకటించిన ‘లిబరేషన్ డే’ టారిఫ్ల విషయంలోనూ ఇదే జరిగింది. ప్రపంచ దేశాలపై అదనపు పన్నుల నుండి 90 రోజుల మినహాయింపు ఇస్తున్నట్లు ట్రంప్ ప్రకటించడానికి 18 నిమిషాల ముందే అమెరికన్ స్టాక్ ఇండెక్స్ (S&P 500)లో భారీ పెట్టుబడులు వచ్చాయి. నిమిషానికి 100 కాంట్రాక్టులు మాత్రమే జరిగే చోట ఆ సమయంలో 10,000 కంటే ఎక్కువ లావాదేవీలు జరగడం విశేషం. కేవలం 2 మిలియన్ డాలర్లు పెట్టుబడి పెట్టిన వారు ట్రంప్ ప్రకటనతో 20 మిలియన్ డాలర్ల వరకు లాభం పొందారని లెక్కలు చెబుతున్నాయి. వరుసగా ఏడు రోజులు నష్టాల్లో ఉన్న మార్కెట్ ఒక్కసారిగా పుంజుకోవడం వెనుక ప్రభుత్వంలోని ఉన్నత వర్గాలు రహస్యాలను లీక్ చేస్తున్నాయా? అనే సందేహం కలుగుతోంది.
చట్టబద్ధమైన నేరం: మార్కెట్ను ప్రభావితం చేసే సమాచారం ప్రజలకు తెలియక ముందే దానిని ఉపయోగించి లాభపడటం అమెరికా చట్టం ప్రకారం తీవ్రమైన నేరం. ట్రంప్ ప్రతి కదలిక మార్కెట్ను ప్రభావితం చేస్తున్న తరుణంలో, వైట్ హౌస్ నుండి సమాచారం బయటకు వెళ్లకుండా అడ్డుకోవడంలో విఫలమైందని ప్రతిపక్షాలు విమర్శిస్తున్నాయి. అధ్యక్షుడి సోషల్ మీడియా పోస్టులను, ఇంటర్వ్యూలను ముందే ఊహించడం యాదృచ్ఛికం కాదని నిపుణులు అభిప్రాయపడుతున్నారు.
అమెరికాలో రాజకీయ దుమారం: ఈ వ్యవహారంపై సెక్యూరిటీస్ అండ్ ఎక్స్ఛేంజ్ కమిషన్ (SEC) విచారణ జరపాలని డెమొక్రాటిక్ సెనేటర్లు డిమాండ్ చేస్తున్నారు. ప్రభుత్వానికి సన్నిహితంగా ఉండేవారికి, స్నేహితులకు అక్రమ మార్గాల్లో డబ్బు సంపాదించే అవకాశాన్ని కల్పిస్తున్నారని వారు ఆరోపిస్తున్నారు. అయితే, ట్రంప్ శైలిని నిశితంగా గమనించే పెట్టుబడిదారులు ఇలాంటి మార్పులను ముందే అంచనా వేయగలరని మరికొందరు విశ్లేషకులు వాదిస్తున్నారు.
వైట్ హౌస్ వర్గాలు ఈ ఆరోపణలపై ఇంకా అధికారికంగా స్పందించలేదు. విదేశాంగ విధానాలు మరియు ఆర్థిక ప్రకటనలను వ్యక్తిగత లాభాల కోసం ఉపయోగిస్తున్నారనే వార్తలు అమెరికా ప్రజల్లో ఆందోళన కలిగిస్తున్నాయి. మార్కెట్ విశ్వసనీయతను దెబ్బతీసే ఇలాంటి చర్యలపై కఠిన చర్యలు తీసుకోవాలని ఆర్థిక నిపుణులు కోరుతున్నారు.