వాషింగ్టన్: ప్రపంచమంతా ఆసక్తిగా ఎదురుచూస్తున్న ఆ ‘రహస్య బహుమతి’ని అమెరికా అధ్యక్షుడు డొనాల్డ్ ట్రంప్ ఎట్టకేలకు వెల్లడించారు. ఇరాన్‌తో జరుగుతున్న శాంతి చర్చల్లో భాగంగా, గుడ్ విల్ (మంచి ఉద్దేశం) చాటుకోవడానికి 10 భారీ చమురు నౌకలను హోర్ముజ్ జలసంధి ద్వారా సురక్షితంగా వెళ్లేందుకు ఇరాన్ అనుమతించింది. ఇదే ఆ అద్భుత బహుమతి.
వైట్ హౌస్‌లో జరిగిన కీలకమైన క్యాబినెట్ సమావేశంలో ట్రంప్ ఈ వివరాలను పంచుకున్నారు. గత కొన్ని రోజులుగా తనకు ఒక పెద్ద బహుమతి అందబోతోందని ట్రంప్ చెప్పడం ప్రపంచవ్యాప్తంగా చర్చకు దారితీసింది.
మాట నిలబెట్టుకున్న ఇరాన్
“మేము చెప్పేది కేవలం మాటలు కాదు, వాటిని అమలు చేస్తామని నిరూపించడానికి ఎనిమిది పెద్ద చమురు నౌకలను అనుమతిస్తామని వారు (ఇరాన్) చెప్పారు. అది నిజమని ఇప్పుడు నాకు నమ్మకం కలిగింది. అవి పాకిస్తాన్ జెండాతో ఉన్న నౌకలు,” అని ట్రంప్ తెలిపారు.
మొదట ఎనిమిది నౌకలకే ఒప్పందం కుదిరినప్పటికీ, తర్వాత ఆ సంఖ్యను పదికి పెంచారు. గతంలో ఇరాన్ అధికారులు చేసిన కొన్ని వ్యాఖ్యలకు చింతిస్తూ, దానికి బదులుగా మరో రెండు నౌకలను అదనంగా వదిలిపెట్టినట్లు ట్రంప్ వివరించారు. వాషింగ్టన్ మరియు టెహ్రాన్ మధ్య బయటి ప్రపంచానికి తెలియని రహస్య చర్చలు జరుగుతున్నాయనడానికి ఇదే నిదర్శనమని ఆయన పేర్కొన్నారు.
పాక్ జెండాతో నౌకలు
ఈ ప్రక్రియలో పాకిస్తాన్ పోషిస్తున్న పాత్రను కూడా ట్రంప్ ప్రస్తావించారు. నౌకలు ‘పాకిస్తాన్ జెండా’ను కలిగి ఉండటాన్ని ఆయన గమనించారు. దౌత్యపరంగానే కాకుండా, ఈ రవాణా సౌకర్యాలను కల్పించడంలో ఇస్లామాబాద్ కీలక పాత్ర పోషిస్తోందని ఆయన సూచించారు.
అయితే, గల్ఫ్ అరబ్ దేశాల కూటమి (GCC) సెక్రటరీ జనరల్ జాసెమ్ ముహమ్మద్ అల్-బుదైవి ప్రకారం.. ఇరాన్ ఈ నౌకలను సురక్షితంగా పంపడానికి డబ్బు వసూలు చేస్తోంది. దీనిపై ట్రంప్ స్పందిస్తూ, “వారు అలా చేయకూడదు, కానీ ప్రస్తుతం చిన్న స్థాయిలో వసూలు చేస్తున్నారు” అని అన్నారు. యుద్ధం వల్ల చమురు ధరలు పెరుగుతాయని, మార్కెట్లు కుప్పకూలుతాయని తాను భావించానని, అయితే ఆ ప్రభావం అనుకున్నంతగా లేదని ట్రంప్ చెప్పారు.
ఇరాన్ దాడుల్లో 13 అమెరికా సైనిక స్థావరాలు ధ్వంసం
మరోవైపు, పశ్చిమ ఆసియా అంతటా ఇరాన్ జరిపిన భారీ దాడుల్లో కనీసం 13 అమెరికా సైనిక స్థావరాలు నివాసయోగ్యం కాకుండా పోయాయని సమాచారం. దీంతో అమెరికా సైన్యం తమ పటిష్టమైన కోటల వంటి స్థావరాలను వదిలి హోటళ్లు, ఆఫీసు భవనాలకు మారాల్సి వచ్చిందని ‘న్యూయార్క్ టైమ్స్’ నివేదించింది. అధికారులు దీనిని ‘రిమోట్ వార్’ (దూరం నుండి జరుగుతున్న యుద్ధం) అని అభివర్ణిస్తున్నారు.