భోపాల్: మధ్యప్రదేశ్ రాజధాని భోపాల్ను కుదిపేసిన ట్విషా శర్మ కేసులో సీబీఐ దర్యాప్తు కొనసాగుతోంది. ఈ క్రమంలో, సాక్ష్యాలను సేకరించే పనిలో ఉన్న ఒక సాక్షిపై జరిగిన దాడి ఘటన అందరినీ షాక్కు గురిచేసింది. ఈ కేసులో నిందితుడు సమర్థ్కు చెందిన స్నేహితులే తనను తీవ్రంగా కొట్టారని, సాక్ష్యం చెప్పకుండా బెదిరించారని బాధితుడు ఆరోపిస్తున్నారు.
అయితే, అవతలి పక్షం మాత్రం.. ఆ యువకుడు మద్యం మత్తులో తమ రెస్టారెంట్లో గొడవకు దిగాడని వాదిస్తోంది. రెండు వర్గాల ఫిర్యాదులపై పోలీసులు దర్యాప్తు చేస్తున్నారు.
మే 30న జరిగిన ఘటన: ఈ ఘటన మే 30న జరిగింది. బాధితుడు నీరజ్ దూబే, కటారా హిల్స్ ప్రాంతంలో గిరిబాల సింగ్ ఇంటి సమీపంలో ‘సాంచి పార్లర్’ నడుపుతుంటారు. ట్విషా శర్మ కేసులో పోలీసులు సాక్ష్యాలను సేకరిస్తున్నప్పుడు ఆయనను సాక్షిగా చేర్చుకున్నారు. శనివారం నాడు ఆయన అదే ప్రాంతంలోని ఒక రెస్టారెంట్కు వెళ్లారు.
సాక్ష్యం చెప్పొద్దని ఒత్తిడి: రెస్టారెంట్కు వెళ్లగానే, 4 నుండి 5 మంది యువకులు నీరజ్ దూబేను చుట్టుముట్టారు. “ఈ కేసులో నువ్వు సాక్షిగా ఎందుకు ఉంటున్నావు?” అంటూ అతడిని చితకబాదారు. సాక్ష్యం చెప్పకుండా ఉండేందుకు వారు తనపై ఒత్తిడి తెచ్చారని, దాడి చేశారని నీరజ్ తెలిపారు. వీరు నిందితుడు సమర్థ్కు స్నేహితులని బాధితుడు ఆరోపిస్తున్నారు. గాయపడిన నీరజ్ వెంటనే కటారా హిల్స్ పోలీస్ స్టేషన్లో ఫిర్యాదు చేశారు.
ఇరువర్గాల ఫిర్యాదులు: మరోవైపు రెస్టారెంట్ నిర్వాహకులు కూడా ఫిర్యాదు చేశారు. నీరజ్ దూబే మద్యం మత్తులో రెస్టారెంట్లోకి ప్రవేశించి గొడవ చేశాడని వారి వాదన. స్టేషన్ ఇన్ఛార్జ్ సునీల్ దూబే మాట్లాడుతూ, “ముందుగా రెస్టారెంట్ వాళ్ల ఫిర్యాదు వచ్చింది. మేము నీరజ్ను విచారించే లోపే, ఆయన తమపై దాడి జరిగిందని ఫిర్యాదు చేశారు” అని తెలిపారు. పోలీసులు ప్రస్తుతం సీసీటీవీ ఫుటేజీని పరిశీలిస్తున్నారు.
సీసీటీవీలో రికార్డైన దృశ్యాలు: ఈ దాడి ఘటన సమీపంలోని సీసీటీవీ కెమెరాలో రికార్డైంది. యువకులు నీరజ్ దూబేపై ఏ విధంగా దాడి చేశారో అందులో స్పష్టంగా కనిపిస్తోంది. ఈ వీడియో ఈ కేసులో కీలక ఆధారంగా మారనుంది.