అమితాబ్ బచ్చన్ ‘దద్దూ’ గుర్తుండే ఉంటారు కదా? ఆయన సినిమాల్లో చిన్న చిన్న పాత్రలే చేసినప్పటికీ, తెరపై కనిపించిన కొద్దిసేపట్లోనే ప్రతి ఒక్కరి మనసు గెలుచుకునేవారు. ఆయన మరెవరో కాదు, దిగ్గజ నటుడు ఓం ప్రకాష్ (Om Prakash). అమితాబ్‌తో కలిసి ‘నమక్ హలాల్’ సినిమాలో ఆయన పోషించిన ‘దద్దూ’ పాత్ర ఎంతో ఫేమస్ అయ్యింది. శరాబీ, పడోసన్, గోపీ, చుప్కే చుప్కే వంటి ఎన్నో సూపర్ హిట్ చిత్రాల్లో ఆయన నటించారు.
జాలితో ప్రేయసిని వదిలేశారు: తెరపై కామెడీతో పాటు విలనిజం కూడా పండించిన ఓం ప్రకాష్ మనసు నిజ జీవితంలో వెన్న లాంటిది. ఒక వితంతువుపై జాలితో ఆయన పెళ్లి చేసుకున్నారు. విశేషమేమిటంటే, అప్పటికే ఆయన ఒక అమ్మాయితో ప్రేమలో ఉన్నారు. కానీ ఒక నిస్సహాయురాలికి సహాయం చేయడం కోసం తన ప్రేయసిని వదిలేశారు.
ఆ వితంతువు అభ్యర్థన: 1994లో ఒక ఇంటర్వ్యూలో ఓం ప్రకాష్ ఈ విషయాన్ని స్వయంగా పంచుకున్నారు:
“నేను ఒకరోజు పాన్ షాప్ దగ్గర ఉన్నప్పుడు, ఒక మహిళ పరిగెత్తుకుంటూ నా దగ్గరకు వచ్చి.. తాను వితంతువునని, తనకు నలుగురు కూతుళ్లు ఉన్నారని చెప్పింది. వారిలో ఒకరిని పెళ్లి చేసుకోవాలని తన చీర కొంగు చాచి ప్రాధేయపడింది. అది చూసి నేను షాక్‌కు గురవ్వడమే కాకుండా ఎంతో భావోద్వేగానికి లోనయ్యాను. వెంటనే పెళ్లికి ఒప్పుకున్నాను.”
ఆ తర్వాత తన ప్రేయసి దగ్గరకు వెళ్లి విషయం చెప్పగా, ఆమె మొదట షాక్ తిన్నప్పటికీ.. తన కుటుంబం వారి పెళ్లికి ఒప్పుకోదనే ఉద్దేశంతో విడిపోవడానికి అంగీకరించింది. ఆ వితంతువు కుమార్తెతో జరిగిన ఓం ప్రకాష్ వివాహానికి ఆయన మాజీ ప్రేయసి కూడా హాజరు కావడం విశేషం.
మూడు రోజులు ఆకలితో: దాదాపు 307 సినిమాల్లో నటించిన ఓం ప్రకాష్ కెరీర్ ఆరంభంలో ఎన్నో కష్టాలు పడ్డారు. దేశ విభజన తర్వాత లాహోర్ నుండి ముంబై వచ్చినప్పుడు పని కోసం తిరుగుతూ, చేతిలో పైసా లేక వరుసగా మూడు రోజులు ఆకలితో గడిపిన సందర్భాలు ఉన్నాయి. ఆకలి తట్టుకోలేక ఒకరోజు ఆయనకు స్పృహ తప్పి పడిపోయినంత పని అయ్యింది.