ప్రమేహ నియంత్రణ కోసం కేవలం మందులు వాడితే సరిపోదు, జీవనశైలిలో మార్పులు కూడా అవసరం. రక్తంలోని చక్కెర స్థాయిలను రోజంతా అదుపులో ఉంచే ఆరు సూత్రాలు ఇవే:
- నీరు తాగడం: రాత్రంతా నిద్రపోవడం వల్ల శరీరం డీహైడ్రేషన్‌కు గురవుతుంది. ఉదయాన్నే లేవగానే ఒక గ్లాసు నీరు తాగడం వల్ల శరీరంలోని విషతుల్యాలు బయటకు పోతాయి. ఇది రక్తాన్ని పలచబరిచి చక్కెర స్థాయిలను తగ్గించడంలో సహాయపడుతుంది.
- మెంతుల నీరు: ముందు రోజు రాత్రి నీళ్లలో నానబెట్టిన మెంతులను లేదా ఆ నీటిని ఉదయాన్నే తీసుకోవడం డయాబెటిస్ నియంత్రణకు చాలా మంచిది. మెంతుల్లో ఉండే పీచు పదార్థం జీర్ణక్రియను నెమ్మదింపజేసి, చక్కెర రక్తంలోకి త్వరగా చేరకుండా నియంత్రిస్తుంది.
- ప్రోటీన్ అధికంగా ఉండే అల్పాహారం: ఉదయం పూట కార్బోహైడ్రేట్లు తక్కువగా, ప్రోటీన్లు ఎక్కువగా ఉండే ఆహారాన్ని తీసుకోవాలి. గుడ్లు, పప్పు ధాన్యాలు, ఓట్స్ వంటివి ఇందుకు ఉత్తమం. ప్రోటీన్ వల్ల ఆకలి త్వరగా వేయదు మరియు ఇన్సులిన్ నిరోధకతను తగ్గిస్తుంది.
- వ్యాయామం: ప్రతిరోజూ ఉదయం 20-30 నిమిషాల పాటు వేగంగా నడవడం లేదా యోగా చేయడం అలవాటు చేసుకోవాలి. వ్యాయామం చేసినప్పుడు కండరాలు గ్లూకోజ్‌ను శక్తిగా వాడుకుంటాయి, తద్వారా చక్కెర స్థాయిలు సహజంగా తగ్గుతాయి.
- కెఫిన్ నియంత్రణ: పరగడుపున చక్కెర లేని టీ లేదా కాఫీ తాగడం వల్ల కొందరిలో షుగర్ లెవల్స్ పెరగవచ్చు. అందుకే టీతో పాటు ఏదైనా చిన్నపాటి అల్పాహారం తీసుకోవడం మంచిది. కృత్రిమ తీపి పదార్థాలను పూర్తిగా మానేయండి.
- ఒత్తిడి నిర్వహణ: నిద్రలేవగానే ఫోన్ చూడటం లేదా పనుల గురించి ఆందోళన చెందడం వల్ల ఒత్తిడి పెరుగుతుంది. ఒత్తిడి హార్మోన్ అయిన ‘కార్టిసాల్’ పెరగడం వల్ల షుగర్ లెవల్స్ కూడా పెరుగుతాయి. అందుకే ఉదయాన్నే కనీసం 5 నిమిషాల పాటు ప్రశాంతంగా ప్రార్థన లేదా ధ్యానం చేయడం మేలు.
సరైన నిద్ర, క్రమబద్ధమైన ఆహారపు అలవాట్లు మరియు ఈ చిన్నపాటి మార్పులతో ప్రమేహాన్ని సమర్థవంతంగా ఎదుర్కోవచ్చు.