ఉత్తరప్రదేశ్ రాష్ట్రంలోని కాన్పూర్‌లోని ఒక ఆసుపత్రిలో, డాక్టర్ కుర్చీలో కూర్చుని రోగులను ఆరోగ్య పరిస్థితి గురించి అడిగి తెలుసుకుంటూ ప్రిస్క్రిప్షన్ రాసినట్లు చెబుతున్న ఒక వ్యక్తికి సంబంధించిన వీడియో సోషల్ మీడియాలో వైరల్ అవుతోంది.
ఆ వ్యక్తి ఆసుపత్రిలో పనిచేస్తున్న ఒక వైద్యుడి డ్రైవర్ అని సమాచారం. ఈ వీడియో వెలుగులోకి రావడంతో రోగుల భద్రత, ఆసుపత్రి వైద్య విధివిధానాలపై పలు ప్రశ్నలు వ్యక్తమవుతున్నాయి.
కాన్షీరామ్ ఆసుపత్రి ఎమర్జెన్సీ విభాగంలో పనిచేస్తున్న డాక్టర్ రామ్‌కేష్ ఒక కోర్టు కేసులో సాక్ష్యం చెప్పడానికి వెళ్లిన సమయంలో ఈ ఘటన జరిగినట్లు తెలుస్తోంది. ఆ సమయంలో ఆయన డ్రైవర్ దేవ్ ఓపీడీ (అవుట్ పేషెంట్) విభాగంలో కూర్చుని రోగులతో మాట్లాడుతూ మందుల చీటీలు రాసినట్లు సమాచారం. దీనికి సంబంధించిన వీడియో సోషల్ మీడియాలో వైరల్ కావడంతో ఆసుపత్రి యాజమాన్యం విచారణ ప్రారంభించింది.
సెప్టెంబర్ 14 సాయంత్రం ఈ వీడియో తన దృష్టికి వచ్చిందని ఆసుపత్రి చీఫ్ మెడికల్ సూపరింటెండెంట్ డాక్టర్ పియూష్ మిశ్రా తెలిపారు. అనంతరం సెప్టెంబర్ 15 ఉదయం ఆసుపత్రిలో తనిఖీలు నిర్వహించామని, అయితే ఆ సమయంలో అక్కడ బయటి వ్యక్తులెవరూ లేరని ఆయన పేర్కొన్నారు. డాక్టర్ రామ్‌కేష్‌ను వివరణ కోరగా, వీడియోలో కనిపిస్తున్న వ్యక్తి తన డ్రైవరేనని ఆయన అంగీకరించినట్లు సమాచారం.
ఇదిలా ఉండగా, డాక్టర్ అనుమతి లేకుండానే డ్రైవర్ రోగులకు మందుల చీటీలు రాశాడా, అతడికి ఆ అధికారం ఎవరు ఇచ్చారు, వీడియోలోని దృశ్యాలు నిజమైనవేనా అనే కోణంలో విచారణ జరుగుతోంది. ఇలాంటి ఘటన మళ్లీ పునరావృతమైతే సంబంధిత వైద్యుడిపై చర్యలు తీసుకుంటామని, అవసరమైతే ఎఫ్‌ఐఆర్ నమోదు చేసి ప్రభుత్వానికి నివేదిక పంపుతామని ఆసుపత్రి యాజమాన్యం హెచ్చరించింది. విచారణ పూర్తయిన తర్వాతే పూర్తి నిజాలు వెలుగులోకి వస్తాయని అధికారులు వెల్లడించారు.
Leave a Reply