స్విగ్గీ (Swiggy), జెప్టో (Zepto), బ్లింకిట్ (Blinkit) వంటి క్విక్-కామర్స్ డెలివరీ ప్లాట్‌ఫామ్‌లలో డెలివరీ పార్ట్‌నర్‌గా పనిచేయడం ప్రస్తుతం చాలా మందికి పార్ట్-టైమ్ లేదా ఫుల్-టైమ్ ఆదాయ మార్గంగా మారింది.
అయితే పని ప్రారంభించిన తర్వాత వచ్చే ఆదాయం మొత్తం చేతికి రాదు. ఆన్‌బోర్డింగ్ (జాయినింగ్) ఫీజు, శిక్షణ మరియు డెలివరీ కిట్ (వస్తువుల) ఛార్జీలు వంటివి ఆయా సంస్థల నిబంధనల ప్రకారం తర్వాత వచ్చే సంపాదన నుంచి కట్ చేసే అవకాశం ఉంటుంది.
ఉదాహరణకు, స్విగ్గీ ఇన్‌స్టామార్ట్‌లో జాయినింగ్ ఫీజు సుమారు రూ. 1,500 వరకు ఉండవచ్చని, నగరాన్ని బట్టి ఈ మొత్తం మారవచ్చని సమాచారం. జెప్టో వంటి ప్లాట్‌ఫామ్‌లలో కూడా జాయినింగ్ మరియు శిక్షణ కోసం రుసుము ఉండవచ్చు. రిజిస్ట్రేషన్ చేసుకునే సమయంలోనే దీనికి సంబంధించిన వివరాలను డెలివరీ పార్ట్‌నర్‌కు తెలియజేస్తారు. డెలివరీ బ్యాగ్, టీ-షర్ట్, రిఫ్లెక్టివ్ జాకెట్ వంటి వస్తువుల ఖర్చును కూడా ఈ ఖాతాలో చేర్చవచ్చు.
ముఖ్యంగా, ఈ రుసుములను మొదటి రోజే చేతి నుంచి నగదు రూపంలో చెల్లించాల్సిన అవసరం ఉండకపోవచ్చు. కొన్ని సంస్థలు పని ప్రారంభించిన తర్వాత వచ్చే వారాంతపు ఆదాయం (Weekly Payout) నుంచి ఒకే విడతలో లేదా పలు వాయిదాలలో ఈ మొత్తాన్ని మినహాయించుకుంటాయి. అదేవిధంగా, డెలివరీ బ్యాగ్ లేదా టీ-షర్ట్ పాడైపోతే, వాటిని మళ్లీ తీసుకోవడానికి అయ్యే ఛార్జీలను కూడా తదుపరి ఆదాయం నుంచే కట్ చేయవచ్చు.
ఇక్కడితో ఇది ముగియదు. డెలివరీ చేసే సమయంలో వస్తువులు పాడైనా, కనిపించకుండా పోయినా లేదా క్యాష్ ఆన్ డెలివరీ (COD) డబ్బుల వసూళ్లలో తేడాలు వచ్చినా, నిబంధనల ప్రకారం ఆ మొత్తాన్ని కూడా డెలివరీ పార్ట్‌నర్ ఆదాయం నుంచే మినహాయించవచ్చు. సొంత బైక్ లేదా స్కూటీని ఉపయోగించేవారు oil, రిపేర్లు, పంక్చర్, ప్రమాదాలకు సంబంధించిన ఖర్చులను వారే భరించాల్సి ఉంటుంది. కాబట్టి డెలివరీ ఉద్యోగంలో చేరే ముందే, సదరు సంస్థ యొక్క జాయినింగ్ ఫీజు, కిట్ ఛార్జీలు మరియు కోతలకు (Deductions) సంబంధించిన నిబంధనలను పూర్తిగా చదివి తెలుసుకోవడం చాలా ముఖ్యం.