“డ్రైవర్ ఘోర నిర్లక్ష్యం.. చక్రాల కింద నలిగి ప్రాణాలు విడిచిన ఏడాదిన్నర పసికందు.. కర్ణాటకను కుదిపేసిన విషాద ఘటన..!!”

కర్ణాటక రాష్ట్రం మైసూరు ప్రాంతంలో స్కూల్ వాహనం ఢీకొన్న ప్రమాదంలో ఏడాదిన్నర వయసున్న ఆడ శిశువు ప్రాణాలు కోల్పోయిన ఘటన ఆ ప్రాంతంలో తీవ్ర విషాదాన్ని నింపింది.

మైసూరులోని శాస్త్రి పబ్లిక్ స్కూల్‌కు చెందిన ఓ వాహనం, నాలుగేళ్ల బాలుడిని వాడి ఇంటి వద్ద దింపడానికి వచ్చింది. ఆ సమయంలో బాలుడి తల్లి వాడి స్కూల్ బ్యాగును తీసుకునే పనిలో నిమగ్నమై ఉండగా, డ్రైవర్ పరిసరాలను సరిగ్గా గమనించకుండా వాహనాన్ని ముందుకు కదిలించినట్లు తెలుస్తోంది.

అదే సమయంలో సమీపంలో ఆడుకుంటున్న ‘లాతిక్ష’ అనే ఏడాదిన్నర పసికందును ఆ వాహనం ఊహించని విధంగా ఢీకొట్టింది. వాహనం చక్రం చిన్నారిపై నుంచి వెళ్లడంతో, ఆ పసికందు అక్కడికక్కడే శరీరం నలిగిపోయి విలవిలలాడుతూ ప్రాణాలు విడిచింది.

ఈ ప్రమాదంపై చిన్నారి తల్లిదండ్రులు ఇచ్చిన ఫిర్యాదు ఆధారంగా, నిర్లక్ష్యంగా, అతివేగంగా వాహనాన్ని నడిపిన 42 ఏళ్ల డ్రైవర్ సిద్ధరాజుపై పోలీసులు కేసు నమోదు చేశారు.

డ్రైవర్ అజాగ్రత్తే ఇంతటి ఘోర ప్రమాదానికి కారణమని ఆరోపిస్తున్న బంధువులు, అతనిపై కఠినమైన చట్టపరమైన చర్యలు తీసుకోవాలని డిమాండ్ చేస్తున్నారు.