ఢిల్లీ: ఢిల్లీ విమానాశ్రయంలో స్విస్ (SWISS) విమానం టేకాఫ్ అవుతున్న సమయంలో ఇంజన్లో మంటలు చెలరేగడంతో విమానాన్ని అత్యవసరంగా నిలిపివేసినట్లు అధికారులు తెలిపారు. ఈ క్రమంలో జరిగిన తోపులాటలో ఆరుగురు ప్రయాణికులు గాయపడ్డారు.
గాయపడిన ప్రయాణికులను చికిత్స నిమిత్తం ఆసుపత్రికి తరలించారు. విమానంలోని ప్రయాణికులందరినీ ఎమర్జెన్సీ స్లైడ్ల (Emergency Slides) ద్వారా రన్వేపైకి సురక్షితంగా తరలించారు. ఈ విమానం స్విట్జర్లాండ్లోని జ్యూరిచ్కు వెళ్లాల్సి ఉందని అధికారులు వెల్లడించారు.
ఘటన వివరాలు: ఫ్లైట్ నంబర్ LX147, ఎయిర్బస్ A330 విమానం తెల్లవారుజామున 1:08 గంటలకు టేకాఫ్ అవ్వడానికి రన్వేపై వేగంగా వెళ్తుండగా, ఒక ఇంజన్ విఫలమై మంటలు చెలరేగాయి. దీనితో పైలట్లు వెంటనే విమానాన్ని ఆపేశారు.
“ఢిల్లీలో జరిగిన ఫ్లైట్ LX147 ఘటన గురించి మాకు సమాచారం అందింది. ఇందులో 228 మంది ప్రయాణికులు, నలుగురు చిన్నారులు ఉన్నారు. స్విస్ ఎయిర్ ఇప్పటికే ఒక టాస్క్ ఫోర్స్ను ఏర్పాటు చేసింది” అని సదరు విమానయాన సంస్థ ఒక ప్రకటనలో తెలిపింది.
“స్థానిక కాలమానం ప్రకారం తెల్లవారుజామున 1 గంట తర్వాత టేకాఫ్ సమయంలో ఒక ఇంజన్లో సమస్య ఏర్పడింది. సిబ్బంది వెంటనే టేకాఫ్ను నిలిపివేశారు. పరిస్థితిని అంచనా వేసిన తర్వాత, ముందు జాగ్రత్తగా ప్రయాణికులను ఖాళీ చేయించాలని నిర్ణయించారు. ఆరుగురు ప్రయాణికులు ప్రస్తుతం వైద్య సహాయం పొందుతున్నారు, సిబ్బందికి ఎలాంటి గాయాలు కాలేదు” అని ఎయిర్లైన్స్ పేర్కొంది. ఈ ఘటనకు సంబంధించిన దృశ్యాలు సోషల్ మీడియాలో వైరల్ అయ్యాయి.
స్లైడ్ల ద్వారా దిగలేని కొందరి కోసం మెట్లు ఏర్పాటు చేసినట్లు సంస్థ తెలిపింది. ప్రయాణికులకు హోటల్ వసతి లేదా ప్రత్యామ్నాయ విమాన ఏర్పాట్లు చేయడానికి స్థానిక బృందాలు తీవ్రంగా కృషి చేస్తున్నాయని స్విస్ ఎయిర్ వెల్లడించింది.
“ఇలాంటి పరిస్థితులు అందరికీ ఆందోళన కలిగిస్తాయి. మా బృందాలు ప్రయాణికులతో నేరుగా సంప్రదింపులు జరుపుతున్నాయి. స్థానిక అధికారులతో కలిసి పనిచేస్తున్నాం” అని సంస్థ తెలిపింది. ఈ ప్రమాదానికి గల కారణాలను పూర్తిస్థాయిలో తెలుసుకోవడానికి సాంకేతిక నిపుణులు ఢిల్లీకి చేరుకుని విమానాన్ని తనిఖీ చేయనున్నారు. ప్రయాణికులు మరియు సిబ్బంది భద్రతకే తాము అత్యంత ప్రాధాన్యత ఇస్తామని ఎయిర్లైన్స్ స్పష్టం చేసింది.