ఢిల్లీ: రజియా సుల్తాన్ (1205-1240) భారత చరిత్రలో తొలి మహిళా పాలకురాలు. మహిళలను అంతఃపురాలకే పరిమితం చేసే ఆ కాలంలో, ఆమె రాజ్యాన్ని పాలించడమే కాకుండా యుద్ధభూమిలో శత్రువులను ఎదుర్కొని సాహసం చూపారు. ఆమె నాలుగేళ్ల స్వల్ప పాలనలో ఎన్నో సంస్కరణలు చేపట్టి, ప్రజల మన్ననలు పొందారు.
అద్భుతమైన పాలకురాలు: రజియా సుల్తాన్, ఢిల్లీ సుల్తాన్ షంసుద్దీన్ ఇల్తుమిష్ కుమార్తె. తన తండ్రి ఆమెలోని ప్రతిభను గుర్తించి, కుమారుల కంటే ఎక్కువగా ఆమెకు సైనిక శిక్షణ, పరిపాలనా నైపుణ్యాలను నేర్పించారు. ఇల్తుమిష్ తర్వాత ఆమెను వారసురాలిగా ప్రకటించారు. 1236లో తండ్రి మరణం తర్వాత రజియా సుల్తాన్ ఢిల్లీ సింహాసనాన్ని అధిష్టించారు. ఆమె పాలనలో బావులు, రహదారుల నిర్మాణం, కళలు, సంగీతం మరియు హిందూ-ముస్లిం ఐక్యతకు ప్రాధాన్యతనిచ్చారు.
బానిసతో ప్రేమాయణం: రజియా సుల్తాన్ తన బానిస అయిన జమలుద్దీన్ యాకూత్తో ప్రేమలో పడ్డారనేది చారిత్రక అంశాలలో ఒకటి. ఆమెకు అత్యంత నమ్మకస్తుడైన యాకూత్ను ఆమె అశ్వికదళాధిపతిగా నియమించారు. అయితే, ఒక మహిళా పాలకురాలు బానిసను ప్రేమించడం, అతనికి ఉన్నత స్థానం కల్పించడం ఆనాటి ఉన్నతాధికారులకు, రాజప్రతినిధులకు ఏమాత్రం నచ్చలేదు. ఇది వారి తిరుగుబాటుకు దారితీసింది.
విషాదాంతం: భటిండా గవర్నర్ ఇక్తియార్ అల్తునియా, రజియా అందానికి ముగ్ధుడై ఆమెను సొంతం చేసుకోవాలనుకున్నాడు. తిరుగుబాటుదారులతో కలిసి అల్తునియా ఢిల్లీపై దాడి చేశాడు. ఈ పోరాటంలో యాకూత్ మరణించగా, రజియా బందీగా చిక్కారు. ప్రాణభయంతో రజియా అల్తునియాను వివాహం చేసుకున్నారు. అటువైపు, రజియా సోదరుడు బెహ్రామ్ షా ఢిల్లీ సింహాసనాన్ని ఆక్రమించాడు.
సింహాసనాన్ని తిరిగి పొందేందుకు రజియా మరియు అల్తునియా ప్రయత్నించి ఓడిపోయారు. చివరకు, 1240 అక్టోబర్ 14న, ఖైతాల్ వద్ద దొంగల దాడిలో వీరిద్దరూ మరణించారు. ఆమె చనిపోయినప్పటికీ, భారత చరిత్రలో ఒక ధీరవనితగా, సాహసోపేతమైన మహిళా పాలకురాలిగా రజియా సుల్తాన్ పేరు చిరస్థాయిగా నిలిచిపోయింది.