తమిళనాడులో కొత్త ప్రభుత్వం ఏర్పాటుపై ఉత్కంఠ వీడటం లేదు. అసెంబ్లీ ఎన్నికల్లో 108 సీట్లు గెలుచుకుని అతిపెద్ద పార్టీగా అవతరించిన దళపతి విజయ్ నేతృత్వంలోని టీవీకే (TVK) మెజారిటీ మార్కును చేరుకోవడానికి ప్రయత్నిస్తోంది.
ఈ క్రమంలో మద్దతు లేఖపై కొత్త వివాదం చెలరేగింది. ఏఎంఎంకే పార్టీ ప్రధాన కార్యదర్శి టీటీవీ దినకరన్.. తమ ఎమ్మెల్యే కామరాజ్ పేరుతో టీవీకే పార్టీ ఒక నకిలీ మద్దతు లేఖను గవర్నర్కు పంపిందని ఆరోపించారు. ఈ వ్యవహారంపై క్రిమినల్ ఫిర్యాదు చేస్తున్నట్లు ఆయన తెలిపారు.
విజయ్ నేతృత్వంలోని టీవీకేకు తమ పార్టీ మద్దతు ఇచ్చిందన్న వార్తలను దినకరన్ ఖండించారు. తాము ఎన్డీయే (NDA) కూటమితోనే ఉన్నామని ఆయన స్పష్టం చేశారు. ఎమ్మెల్యే కామరాజ్ ప్రస్తుతం ఏఐఏడీఎంకే (AIADMK) నూతన ఎమ్మెల్యేలతో కలిసి పుదుచ్చేరిలోని ఒక రిసార్ట్లో ఉన్నారని, టీవీకేకు మద్దతు ఇచ్చే ప్రశ్నే లేదని మీడియా వార్తలను కొట్టిపారేశారు.
ఏఎంఎంకే ఫిర్యాదు
ఏఎంఎంకే ప్రధాన కార్యదర్శి టీటీవీ దినకరన్ గిండి రేంజ్ అసిస్టెంట్ పోలీస్ కమిషనర్ కార్యాలయానికి చేరుకుని ఫిర్యాదు చేశారు. ఎమ్మెల్యే కామరాజ్ సంతకాన్ని ఫోర్జరీ చేసి నకిలీ లేఖ సృష్టించారని ఆయన ఆరోపించారు.
మరోవైపు, టీవీకే పార్టీ ఎమ్మెల్యే కామరాజ్కు సంబంధించిన ఒక వీడియోను విడుదల చేసింది. అందులో ఆయన తాను ఏఎంఎంకే ప్రధాన కార్యదర్శి అనుమతితోనే స్వచ్ఛందంగా, సంతోషంగా టీవీకేకు మద్దతు లేఖ రాశానని చెబుతుండటం విశేషం.
మద్దతుపై భిన్న వాదనలు
మన్నార్గుడి నియోజకవర్గం నుండి గెలిచిన ఏఎంఎంకే ఏకైక ఎమ్మెల్యే ఎస్. కామరాజ్ టీవీకేకు మద్దతు ఇచ్చారని వార్తలు వచ్చాయి. అయితే దినకరన్ ‘X’ (ట్విట్టర్) వేదికగా స్పందిస్తూ.. తమ పార్టీ జాతీయ ప్రజాస్వామ్య కూటమి (NDA)లోనే కొనసాగుతుందని, ఈ విషయంలో ఎలాంటి మార్పు లేదని స్పష్టం చేశారు.
మెజారిటీకి 10 సీట్ల దూరం
విజయ్ నేతృత్వంలోని టీవీకే 108 సీట్లు సాధించింది, కానీ మెజారిటీకి (118) ఇంకా 10 సీట్ల దూరంలో ఉంది. ఏప్రిల్ 23న జరిగిన ఎన్నికల్లో గెలిచిన తర్వాత విజయ్ ప్రభుత్వం ఏర్పాటు కోసం డీఎంకే మిత్రపక్షాలైన సీపీఐ, సీపీఎం మరియు వీసీకేలను సంప్రదించి మద్దతు కోరారు. 234 మంది సభ్యుల అసెంబ్లీలో ఈ మూడు పార్టీలకు చెరో ఇద్దరు ఎమ్మెల్యేలు ఉన్నారు. ఇప్పటికే సీపీఐ, సీపీఎంలు విజయ్కు మద్దతు ప్రకటించగా, వీసీకే (VCK) ఈరోజు తన నిర్ణయాన్ని వెల్లడించనుంది.