“తీరని అపరాధ భావం.. రాత్రిళ్లు నిద్ర పట్టడం లేదు”.. ఎయిర్ ఇండియా ప్రమాదం జరిగి ఏడాది దాటినా వీడని మృత్యు ఛాయలు!

గత ఏడాది భారతదేశంలో అత్యంత ఘోరమైన విమాన ప్రమాదం ఒకటి చోటుచేసుకుంది. గుజరాత్ నుండి లండన్ వెళ్తున్న విమానం టేకాఫ్ అయిన కొద్ది క్షణాల్లోనే ప్రమాదానికి గురవగా, ఈ దుర్ఘటనలో మొత్తం 260 మంది ప్రాణాలు కోల్పోయారు. అయితే, ఆ విమానంలో ఉన్న ప్రయాణికుల్లో కేవలం ఒకే ఒక్క వ్యక్తి మాత్రం అద్భుత రీతిలో ప్రాణాలతో బయటపడ్డాడు. కానీ, ప్రమాదం జరిగి ఏడాది గడిచినా.. ఆ భయంకరమైన కోర జ్ఞాపకాల నుండి ఆయన ఇప్పటికీ బయటపడలేక, మానసిక నరకాన్ని అనుభవిస్తూ పోరాడుతున్నాడు.

సరిగ్గా ఏడాది క్రితం, ఇదే రోజున గుజరాత్ రాష్ట్రం అహ్మదాబాద్ నుండి లండన్ బయలుదేరిన ఎయిర్ ఇండియా విమానం ఘోర ప్రమాదానికి గురైన వార్త ప్రపంచాన్ని ఒక్కసారిగా కుదిపేసింది. ఆ దారుణ ప్రమాదంలో విమానంలో ఉన్నవారంతా మరణించగా, విశ్వాస్‌కుమార్ రమేష్ అనే 39 ఏళ్ల వ్యక్తి మాత్రం అద్భుతంగా ప్రాణాలతో మిగిలాడు.

ఆ నల్లటి రోజు – ఏం జరిగింది?:
ఈ ప్రమాదం జరిగి నేటికి ఏడాది పూర్తయిన సందర్భంగా రమేష్ పంచుకున్న కొన్ని విషయాలు గుండెలను పిండేస్తున్నాయి. 2025 జూన్ 12న అహ్మదాబాద్ విమానాశ్రయం నుండి లండన్ వైపు బోయింగ్ 787 డ్రీమ్‌లైనర్ విమానం బయలుదేరింది. ఆ విమానంలో 12 మంది సిబ్బందితో సహా మొత్తం 242 మంది ప్రయాణికులు ఉన్నారు. అయితే విమానం రన్‌వే నుండి పైకి లేచిన కేవలం 32 సెకన్లలోనే, ఊహించని విధంగా ఒక మెడికల్ కాలేజీ స్టూడెంట్ హాస్టల్ మరియు క్యాంటీన్ భవనాన్ని బలంగా ఢీకొట్టి కుప్పకూలిపోయింది.

ఈ ఘోర ప్రమాదంలో విమానంలో ఉన్న 241 మంది అక్కడికక్కడే మృతి చెందారు. అంతేకాకుండా, విమానం క్యాంటీన్ భవనంపై పడటంతో కింద గ్రౌండ్‌లో ఉన్న మరో 19 మంది కూడా ప్రాణాలు కోల్పోయారు. దీంతో మొత్తం మరణాల సంఖ్య 260కి చేరింది.

ప్రాణాలతో బయటపడిన ఏకైక వ్యక్తి:
ప్రమాదం జరిగిన మొదటి కొన్ని గంటల్లో విమానంలో ఉన్నవారంతా చనిపోయారని అందరూ భావించారు. కానీ, ప్రమాద స్థలం నుండి రక్తపు మరకలు ఉన్న టీ-షర్ట్ ధరించి, చేతిలో మొబైల్ ఫోన్‌తో విశ్వాస్‌కుమార్ రమేష్ నడుచుకుంటూ వస్తున్న వీడియో అప్పట్లో సోషల్ మీడియాలో దావానంలా వ్యాపించింది. 260 మంది చనిపోయిన ఆ భీకర ప్రమాదంలో బతికిన ఏకైక వ్యక్తి ఆయనే.

రాత్రిళ్లు నిద్ర రావడం లేదు:
ప్రస్తుతం బ్రిటన్‌ (UK) లోని లెస్టర్ (Leicester) నగరంలో నివసిస్తున్న రమేష్, ఈ ప్రమాదం తర్వాత తన జీవితం ఎంత ఛిన్నభిన్నమైందో వివరిస్తూ కన్నీరు పెట్టుకున్నాడు. “నేను ప్రాణాలతో బయటపడటాన్ని ప్రజలు చూస్తున్నారు. కానీ, నేను అనుభవిస్తున్న నరకం వారికి తెలియదు. ఆ ప్రమాద భయంకర దృశ్యాలు కళ్లముందే కదలాడుతుండటంతో రాత్రిళ్లు అస్సలు నిద్ర పట్టడం లేదు. శారీరకంగా, మానసికంగా నేను తీవ్రంగా దెబ్బతిన్నాను” అని ఆవేదన వ్యక్తం చేశాడు.

అంతేకాకుండా, ఆయన ప్రస్తుతం ‘సర్వైవర్ గిల్ట్’ (Survivor Guilt) అనే తీవ్రమైన మానసిక సమస్యతో బాధపడుతున్నాడు. అందరూ చనిపోయి తాను మాత్రమే ఎందుకు బతికాను అనే ఒక రకమైన అపరాధ భావం, తీవ్రమైన దిగ్భ్రాంతి (ట్రామా) లో ఆయన ఉన్నాడు. ఈ ప్రమాదంలో రమేష్ తన సొంత సోదరుడు అజయ్‌ను కూడా కోల్పోవడం గమనార్హం.

“నేను సజీవంగా ఉన్నందుకు దేవుడికి కృతజ్ఞతలు చెబుతాను, కానీ ప్రాణాలతో బయటపడటం అనేది కథలో ఒక భాగం మాత్రమే. ఆ తర్వాత నేను ఎదుర్కొంటున్న శారీరక, మానసిక, మరియు ఆర్థికపరమైన పోరాటాలను మాటల్లో వర్ణించలేను” అని ఆయన ఎమోషనల్ అయ్యాడు.

ఇల్లు దాటి బయటకు రాలేని స్థితి:
లెస్టర్ ప్రాంతానికి చెందిన సంజీవ్ పటేల్ అనే వ్యక్తి గత ఏడాది కాలంగా రమేష్ కుటుంబానికి అండగా ఉంటున్నారు. ఆయన మాట్లాడుతూ.. “రమేష్ ప్రస్తుతం ఇతరుల సహాయం లేనిదే ఇల్లు దాటి బయటకు కూడా రాలేని స్థితిలో ఉన్నాడు. ఆయన మానసిక స్థితి ఘోరంగా దెబ్బతింది. ఈ విమాన ప్రమాద ప్రభావం నుండి ఆయన ఎప్పటికి కోలుకుంటాడో ఎవరికీ తెలియదు. బహుశా జీవితాంతం ఈ బాధ ఆయనతోనే ఉండిపోవచ్చు” అని ఆందోళన వ్యక్తం చేశారు.

ప్రస్తుతం ఈ విమాన ప్రమాదంపై భారత దర్యాప్తు సంస్థలతో కలిసి బ్రిటన్‌కు చెందిన ఎయిర్ యాక్సిడెంట్ ఇన్వెస్టిగేషన్ బ్రాంచ్ ఉమ్మడిగా విచారణ జరుపుతోంది. గత మార్చి నెలలో రమేష్ స్వయంగా అహ్మదాబాద్ వెళ్లి దర్యాప్తు అధికారులను కలిసి ప్రమాదానికి సంబంధించిన వివరాలను పంచుకున్నారు. ఈ ప్రమాదానికి గల పూర్తి కారణాలు తుది నివేదిక (Final Report) వస్తేనే స్పష్టమవుతాయి.