మహారాష్ట్ర క్రైమ్ న్యూస్: మహారాష్ట్రలోని నాశిక్ జిల్లాలో శుక్రవారం రాత్రి ఒక నగల దుకాణంలో దోపిడీకి ప్రయత్నించిన సాయుధ దుండగుల ప్లాన్ను.. అక్కడి సిబ్బంది ప్రాణాలకు తెగించి ఎదుర్కొని తిప్పికొట్టారు.
పోలీసులు తెలిపిన వివరాల ప్రకారం.. నాశిక్లోని హీరావాడి ప్రాంతంలో ఉన్న ‘న్యూ సమృద్ధి జ్యువెలర్స్’ అనే నగల దుకాణంలోకి శుక్రవారం రాత్రి 9 గంటల ప్రాంతంలో ముసుగులు ధరించిన దుండగులు చొరబడ్డారు. తుపాకులు (పిస్టల్స్) చూపిస్తూ అక్కడి సొత్తును దోచుకోవడానికి ప్రయత్నించారు. ఈ ఘటనకు సంబంధించిన సీసీటీవీ ఫుటేజీలో.. ముగ్గురు సిబ్బంది దుకాణంలో పని చేసుకుంటుండగా నలుగురు వ్యక్తులు లోపలికి ప్రవేశించడం స్పష్టంగా కనిపించింది.
ముసుగులు ధరించి లోపలికి..
నిందితులు తమ గుర్తింపును దాచుకోవడానికి ముందస్తు జాగ్రత్తలు తీసుకున్నారు. వారు తలలకు టోపీలు, ముఖాలకు ముసుగులు ధరించగా, ఒక నిందితుడు ఏకంగా హెల్మెట్ పెట్టుకుని లోపలికి వచ్చాడు. దుకాణంలోకి రాగానే ఒక దుండగుడు తుపాకీ తీసి అక్కడ ఉన్న సిబ్బంది వైపు గురిపెట్టాడు.
ఆ సమయంలో ఒక ఉద్యోగి భయంతో దాక్కునేందుకు ప్రయత్నించగా, మిగిలిన ఇద్దరు ఉద్యోగులు మాత్రం వెనక్కి తగ్గకుండా దుండగులను నేరుగా ఎదుర్కొన్నారు. వారిద్దరూ కలిసికట్టుగా ప్రాణాలకు తెగించి దుండగులతో శారీరకంగా పోరాడారు. సిబ్బంది నుండి ఊహించని రీతిలో ఎదురుదాడి జరగడంతో తట్టుకోలేకపోయిన దోపిడీ దొంగలు.. చివరకు అక్కడి నుండి ఖాళీ చేతులతో పారిపోవాల్సి వచ్చింది.
ఉద్యోగి తలపై పిస్టల్తో దాడి
ఈ ఘర్షణ జరుగుతున్న సమయంలో, దుండగులు ఒక ఉద్యోగిని లొంగదీసుకోవడానికి తన వద్ద ఉన్న పిస్టల్ వెనుక భాగం (బట్) తో అతని తలపై బలంగా పదే పదే కొట్టారు. ఈ దాడిలో సదరు ఉద్యోగి తలకు తీవ్ర గాయాలయ్యాయి. ప్రస్తుతం అతడిని చికిత్స నిమిత్తం జిల్లా ప్రభుత్వ ఆసుపత్రికి తరలించారు.
ఈ ఘటనపై సమాచారం అందుకున్న వెంటనే పోలీసులు సంఘటనా స్థలానికి చేరుకున్నారు. అక్కడ ఉన్న సీసీటీవీ ఫుటేజీని నిశితంగా పరిశీలించి, నిందితులను పట్టుకోవడానికి పలు ప్రత్యేక బృందాలను రంగంలోకి దించారు.