ముంబైకి చెందిన రూమా ఎస్. భౌమిక్ అనే మహిళ, తన 31వ అంతస్తులోని అపార్ట్‌మెంట్ బాత్‌రూమ్ కిటికీ వెలుపల ఉన్న తేనెగూడును తొలగిస్తున్న వీడియోను పంచుకోవడంతో ఇంటర్నెట్‌లో పెద్ద చర్చకు దారితీసింది.
ఆ వీడియోలో, పెస్ట్ కంట్రోల్ (Pest Control) సిబ్బంది రసాయన స్ప్రే మరియు పొగను ఉపయోగించి తేనెగూడును తొలగిస్తున్న దృశ్యాలు ఉన్నాయి. “ఇది ఇరు పక్షాలకూ మంచిది కాదు” అనే క్యాప్షన్‌తో ఆమె పోస్ట్ చేసిన ఈ వీడియోకు ఇప్పటివరకు 20 లక్షలకు పైగా వ్యూస్ వచ్చాయి. వీడియో చివరిలో ఆ తేనెగూడు తొలగించబడినప్పటికీ, కిటికీ పక్కన కుప్పలు తెప్పలుగా తేనెటీగలు చనిపోయి పడి ఉండటం చూసిన వారు షాక్‌కు గురవుతున్నారు.
నెటిజన్ల స్పందన: ఈ వీడియో చూసిన నెటిజన్లు రకరకాలుగా స్పందిస్తున్నారు. “తేనెటీగలను చంపకుండా సురక్షితంగా వేరే చోటికి మార్చాల్సింది, ఇది తప్పుడు పద్ధతి” అని పర్యావరణ ప్రేమికులు మండిపడుతున్నారు. “తేనెటీగలు ఉండబట్టే ఈ ప్రపంచం పచ్చగా ఉంది” అని మరికొందరు వ్యాఖ్యానిస్తున్నారు. అదే సమయంలో, తమ ఇళ్లలో కూడా ఇలాంటి సమస్య ఉందంటూ, ఆ పెస్ట్ కంట్రోల్ సంస్థ చిరునామా అడుగుతూ కొందరు ఆసక్తి చూపుతున్నారు. మొత్తానికి, ఒక తేనెగూడు తొలగింపు వ్యవహారం సోషల్ మీడియాలో ఒక “సినిమా రేంజ్”లో చర్చనీయాంశంగా మారింది.