బెంగళూరు శివార్లలో తమ వాహనాన్ని పక్కకు తీసి దారి ఇవ్వమని అడిగినందుకు ఇద్దరు వ్యక్తులు ఒక మహిళ కారును అడ్డగించి, ఆమెను బెదిరించడమే కాకుండా ఆమె భర్తపై కూడా భౌతిక దాడికి పాల్పడ్డారు.
ఈ ఘటన శుక్రవారం మధ్యాహ్నం జరిగింది. బెంగళూరు రూరల్ పరిధిలోని హెసరఘట్ట గ్రాస్ల్యాండ్స్ (గడ్డి భూములు) లో ఉన్న తన ఫామ్హౌస్లో ఉన్న భర్త భరత్కు భోజనం అందించి, రచన తన రేంజ్ రోవర్ కారులో తిరిగి వస్తుండగా ఈ ఘటన చోటుచేసుకుంది. ఆమె వస్తున్న మార్గంలో ఒక ఎర్టిగా (Ertiga) కారు రోడ్డుకు అడ్డంగా పార్క్ చేసి ఉంది, దాని తలుపులు కూడా తెరిచి ఉన్నాయి. రచన హారన్ కొట్టగా, ఆ కారు వద్ద ఉన్న వ్యక్తులలో ఒకడు రచన కారు డ్రైవర్ వైపునకు వచ్చి కిటికీ అద్దం దించాలని కోరాడు. ఆ తర్వాత వారు ఆమెను ఫోటోలు తీశారు. దాంతో ఆందోళన చెందిన ఆమె వెంటనే తన భర్త భరత్కు ఫోన్ చేసి రప్పించింది. రచన కన్నడలో మాట్లాడటం విన్న నిందితులు, “నువ్వు కన్నడ దానివా, రా నీ సంగతి చూస్తా” అంటూ బెదిరింపులకు దిగారు.
ఆ తర్వాత వారు కారును పక్కకు తీయడంతో రచన తన ప్రయాణాన్ని కొనసాగించింది. అయితే, కేవలం 500 మీటర్ల దూరం వెళ్లేసరికి అదే వ్యక్తులు మళ్లీ ఆమె కారును అడ్డగించారు. కారులోంచి ఇద్దరు వ్యక్తులు దిగి రచన కారుకు ఇరువైపులా నిలబడ్డారు. కారు అద్దం దించకపోతే పగలగొడతామని వారిలో ఒకడు బెదిరించాడు. అంతలోనే భర్త భరత్ ఘటనా స్థలానికి చేరుకుని, రచన తీసిన ఫోటోలను డిలీట్ చేయాలని నిందితులను కోరాడు. దీనికి ఆగ్రహం వ్యక్తం చేసిన నిందితులు భరత్ను కిందకు నెట్టేసి, అతనిపై దాడి చేశారు. నిందితుల్లో ఒకడు పెద్ద రాయిని పైకెత్తి భరత్ తలపై కొట్టడానికి ప్రయత్నించాడని దంపతులు పోలీసులకు ఇచ్చిన ఫిర్యాదులో పేర్కొన్నారు.
కొద్దిసేపటికే వారి బంధువులు ప్రకాష్, లక్ష్మీకాంత్ అక్కడికి చేరుకుని భరత్ను నిందితుల నుండి రక్షించారు. నిందితులు మద్యం మత్తులో ఉన్నారని, బూతు పదజాలంతో దూషించారని రచన తన ఫిర్యాదులో ఆరోపించింది. నిందితులను మహేష్, గోవిందరాజులుగా గుర్తించారు. రచన బెంగళూరు మాజీ డిప్యూటీ మేయర్, బీజేపీ నేత ఎస్. హరీష్ కోడలు.