కలబురగి (కర్ణాటక): వయసుతో సంబంధం లేని వ్యామోహం.. అడ్డూఅదుపూ లేని డబ్బు ఆశ.. వెరసి ఒక ఘోర హత్యకు దారితీశాయి. కన్న కొడుకు వయసున్న యువకుడితో వివాహేతర సంబంధం పెట్టుకున్న ఒక ప్రభుత్వ పాఠశాల ఉపాధ్యాయురాలు, అదే యువకుడి చేతిలో అతి కిరాతకంగా ప్రాణాలు కోల్పోయారు. హత్య చేయడమే కాకుండా ఆధారాలు దొరక్కుండా శవాన్ని తగలబెట్టిన నిందితుడు ఇప్పుడు పోలీసుల అదుపులో ఉన్నాడు.
నిర్జన ప్రదేశంలో సగం కాలిన శవం
కలబురగి జిల్లా కమలాపూర్ తాలూకా కలమూడ గ్రామ సమీపంలోని నిర్మానుష్య ప్రాంతంలో కొద్దిరోజుల క్రితం సగం కాలిన స్థితిలో ఒక మహిళ మృతదేహం లభ్యమైంది. శవం గుర్తుపట్టలేనంతగా కాలిపోవడంతో పోలీసులకు ఇది పెద్ద సవాలుగా మారింది. అయితే, లోతుగా దర్యాప్తు చేసిన పోలీసులకు ఆ మృతదేహం కలబురగికి చెందిన జ్యోతి కపాళే (57)గా తేలింది. ఆమె బీదర్ జిల్లా భాల్కీ తాలూకా వంజర్ ఖేడ్ ప్రభుత్వ పాఠశాలలో టీచర్‌గా పనిచేస్తున్నారు.
అక్రమ సంబంధం.. లక్షల డబ్బు!
అవివాహితురాలైన జ్యోతికి తన తల్లి ఇంటి పక్కనే ఉండే అమర్ గుడ్డల్లి (27) అనే యువకుడితో ఐదేళ్ల క్రితం పరిచయం ఏర్పడింది. అమర్‌కు భార్యాపిల్లలు ఉన్నప్పటికీ, జ్యోతి ఇచ్చే డబ్బుకు ఆశపడి ఆమెతో అక్రమ సంబంధాన్ని కొనసాగించాడు.
- థార్ కారు గిఫ్ట్: జ్యోతి ఇచ్చిన సుమారు రూ. 15 నుండి 20 లక్షల డబ్బుతో అమర్ ఏకంగా విలాసవంతమైన ‘థార్’ కారును కొనుగోలు చేశాడు. ఆమె ఇచ్చిన జీతంతోనే అతడు జల్సాలు చేసేవాడు.
హత్యకు దారితీసిన డబ్బు ఒత్తిడి
ఇటీవలి కాలంలో తాను ఇచ్చిన డబ్బును తిరిగి ఇవ్వాలని జ్యోతి.. అమర్‌పై ఒత్తిడి తెచ్చింది. దీంతో ఆమెను అడ్డు తొలగించుకోవాలని అమర్ ప్లాన్ చేశాడు. ఏప్రిల్ 3న ఆమెను తన థార్ కారులో దత్తాత్రేయ దేవాలయానికి తీసుకెళ్లి.. రాత్రి సమయంలో నిర్మానుష్య ప్రాంతానికి తీసుకెళ్లాడు. అక్కడ తన వెంట తెచ్చుకున్న పదునైన ఆయుధంతో ఆమెను గొంతు కోసి చంపేశాడు. అనంతరం కారు డిక్కీలో తెచ్చుకున్న పెట్రోల్ పోసి శవానికి నిప్పు పెట్టి పరారయ్యాడు.
సెల్ ఫోన్ కాల్స్‌తో దొరికిపోయిన కిలేడీ ప్రియుడు
జ్యోతి మొబైల్ ఫోన్ రికార్డులను పరిశీలించిన పోలీసులకు అమర్‌పై అనుమానం వచ్చింది. అతడిని అదుపులోకి తీసుకుని విచారించగా అసలు విషయం బయటపడింది. నిందితుడి నుంచి హత్యకు వాడిన ఆయుధం, పెట్రోల్ క్యాన్ మరియు థార్ కారును పోలీసులు స్వాధీనం చేసుకున్నారు. ప్రస్తుతం అమర్ జైలు ఊచలు లెక్కపెడుతున్నాడు. డబ్బు కోసం మొదలైన ఈ ‘అక్రమ’ బంధం.. ఒకరిని స్మశానానికి, మరొకరిని జైలుకు చేర్చింది.