“దిగులుపడకు, హాయిగా తిను..!” దొంగతనానికి వచ్చిన దొంగ ఇల్లు ఊడ్చి వంట చేసి పెట్టాడు… ఇంగ్లాండ్‌లో జరిగిన నమ్మలేని వింత దొంగతనం! సోషల్ మీడియాలో వైరల్ అవుతున్న ఘటన..!!

ఇంగ్లాండ్‌లోని వేల్స్ ప్రాంతంలో ఉన్న ఒక ఇంట్లోకి చొరబడిన ఒక దొంగ, సాధారణానికి భిన్నంగా వంట చేసి, దుస్తులు ఉతికి ఆరేసి, ఇల్లు కూడా శుభ్రం చేసి వెళ్లిన వింత సంఘటన తీవ్ర ఆశ్చర్యానికి గురిచేసింది.

ఉద్యోగం ముగించుకుని ఇంటికి తిరిగి వచ్చిన ఒక మహిళ, తన ఇంట్లోకి ఎవరో అక్రమంగా చొరబడినట్లు చూసి దిగ్భ్రాంతి చెందింది. అయితే, ఇంట్లో కనిపిస్తున్న దృశ్యాలు సాధారణంగా జరిగే దొంగతనాలకు భిన్నంగా ఉన్నాయి.

ఆ వ్యక్తి ఇంటి వంటగదిలో ఉన్న వస్తువులతో వంట చేసుకుని తినడమే కాకుండా, కొనుగోలు చేసి తెచ్చిన సరుకులను పెట్టెల నుంచి తీసి పద్ధతిగా సర్ది, ఉతికిన బట్టలను ఆరేసాడు.

అంతటితో ఆగకుండా, ఇంటి తోటలోని పక్షుల ఆహార పాత్రలను నింపి, పూల కుండీలను అందంగా సర్దిపెట్టి, అక్కడున్న మద్యం సీసాను తాగి వెళ్లిపోయాడు.

ఇంటి యజమానురాలైన మహిళ కోసం ఆ వ్యక్తి ఒక నోట్ (లేఖ) కూడా రాసి పెట్టాడు. అందులో, “దిగులుపడకు, సంతోషంగా ఉండు, బాగా తిను” అని రాసి ఉంది. ఈ వింత పనికి పాల్పడిన వ్యక్తిని అదుపులోకి తీసుకుని ప్రస్తుతం పోలీసులు విచారణ జరుపుతున్నారు.