జపాన్లో ఆత్మహత్యలు, హత్యలు, ప్రమాదాలు లేదా ఒంటరితనం వల్ల సంభవించిన మరణాలు వంటి దురదృష్టకర సంఘటనలు జరిగిన ఇళ్లు మరియు అపార్ట్మెంట్లను ‘జికో బుక్కన్’ (Jiko Bukkan) అని పిలుస్తారు.
జపనీస్ సంస్కృతిలో ఇలాంటి ప్రదేశాలను దురదృష్టకరమైనవిగా మరియు ఆత్మల సంచారం ఉండేలా భావిస్తారు, అందుకే ప్రజలు అక్కడ నివసించడానికి లేదా వాటిని కొనడానికి చాలా భయపడతారు.
దీని కారణంగా వేలాది ఇళ్లు చాలా ఏళ్లుగా ఉపయోగం లేకుండా తాళాలు వేసి పడి ఉన్నాయి. ఈ ఇళ్లను మళ్లీ అద్దెకు ఇవ్వడానికి లేదా విక్రయించడానికి ‘కాచిమోట్’ అనే జపనీస్ ప్రాపర్టీ మేనేజ్మెంట్ కంపెనీ ఒక వింతైన వ్యూహాన్ని అమలు చేస్తోంది.
ఈ ఇళ్లలో దెయ్యాల సంచారం గానీ లేదా ఎలాంటి అదృష్య శక్తులు గానీ లేవని ప్రజలకు ఆధారపూర్వకంగా నిరూపించడానికి, ప్రత్యేక ఇన్వెస్టిగేటర్లను (పరిశోధకులను) నియమించి అక్కడ ఒక పూర్తి రాత్రి గడిపేలా చేస్తున్నారు. ఈ పని కోసం ఒక ఆస్తికి (ఇంటికి) దాదాపు 88,000 యెన్లు.. అంటే భారతీయ కరెన్సీలో సుమారు రూ. 31,000 వరకు చెల్లిస్తున్నారు.
అక్కడ బస చేసే వ్యక్తులు రాత్రంతా ఎలాంటి వింత సంఘటనలను ఎదుర్కోకపోతే, వారు ఒక అధికారిక భద్రతా నివేదికను (సేఫ్టీ రిపోర్ట్) అందిస్తారు. ఈ రిపోర్ట్, ఆ ఇళ్లను కొనడానికి లేదా అద్దెకు తీసుకోవడానికి వెనుకాడే కొత్త కస్టమర్ల భయాన్ని పోగొట్టి వారిలో గొప్ప నమ్మకాన్ని కలిగిస్తుంది.
చూడటానికి ఇది చాలా భయంకరమైన ఉద్యోగంలా అనిపించినప్పటికీ, జపాన్ రియల్ ఎస్టేట్ మార్కెట్లో నిలిచిపోయిన ఇళ్లను మళ్లీ అందుబాటులోకి తీసుకురావడానికి ఈ ప్లాన్ ప్రస్తుతం అక్కడ ఎంతగానో ఉపయోగపడుతోంది.