బీజింగ్: ఇది ఏదో సినిమా కథలా అనిపించవచ్చు, కానీ చైనాలో ఏడు పెంపుడు కుక్కలు ఒక మాంసం దుకాణం ముఠా నుండి తప్పించుకుని ‘గ్రేట్ ఎస్కేప్’ను ప్రదర్శించాయి. తమ ఇళ్ల నుండి ఎత్తుకెళ్లిన దొంగల కళ్లు గప్పి, కిలోమీటర్ల దూరం ప్రయాణించి అవి సురక్షితంగా తమ యజమానుల వద్దకు చేరుకున్నాయి. ఒక ‘కార్గి’ జాతి కుక్క ముందు నడుస్తూ నాయకత్వం వహిస్తుంటే, దాని వెనుక జర్మన్ షెపర్డ్ వంటి ఇతర కుక్కలు అనుసరిస్తున్న వీడియో సోషల్ మీడియాలో వైరల్ అయ్యింది.
చైనాలోని చాంగ్‌చున్ నగరంలోని ఒక రద్దీ హైవేపై ‘లూ’ అనే వ్యక్తి ఈ దృశ్యాన్ని రికార్డ్ చేశారు. ఆ కుక్కలు అచ్చం కష్టాల్లో ఉన్న సోదరుల బృందంలా కలిసి నడుస్తున్నాయని, అవి వీధి కుక్కల్లా ఏమాత్రం అనిపించడం లేదని ఆయన స్థానిక మీడియాకు తెలిపారు.
వీడియోలో ఏముంది? వీడియోలో కుక్కలన్నీ కలిసి రోడ్డు పక్కన నడుస్తూ కనిపిస్తాయి. బృందానికి ముందున్న కార్గి కుక్క పదే పదే వెనక్కి తిరిగి చూస్తూ మిగిలిన వాటిని గమనిస్తోంది. ఒక జర్మన్ షెపర్డ్ కుంటుతూ వెనుకబడితే, అది వచ్చే వరకు మిగిలిన కుక్కలన్నీ వేచి చూడటం విశేషం. ఈ బృందంలో కార్గి, జర్మన్ షెపర్డ్ తో పాటు గోల్డెన్ రిట్రీవర్లు, లాబ్రాడార్‌లు మరియు పెకింగీస్ జాతి కుక్కలు ఉన్నాయి.
అన్నీ ఒకే ఊరివే! స్థానిక ‘బిట్టర్ కాఫీ స్ట్రే డాగ్ బేస్’ సంస్థ ప్రకారం, ఈ కుక్కలన్నీ ఒకే గ్రామానికి చెందినవి. ఇవి సాధారణంగా కలిసి తిరగడం వల్ల వీటి మధ్య బలమైన స్నేహం ఏర్పడి ఉండవచ్చని ఆ సంస్థ పేర్కొంది. వీడియో వైరల్ అయిన తర్వాత, ఈ సంస్థ డ్రోన్లను ఉపయోగించి కుక్కలను ట్రాక్ చేసి అవి ఇంటికి చేరడంలో సహాయపడింది.
ఈ కుక్కలు మాంసం దుకాణం ట్రక్కు నుండి ఎలా తప్పించుకున్నాయనేది స్పష్టంగా తెలియనప్పటికీ, అవి చివరకు తమ యజమానుల వద్దకు చేరుకోవడం అందరికీ ఊరటనిచ్చింది. “అవి మాంసం దుకాణానికి వెళ్లకుండా తిరిగి రావడం మా అదృష్టం” అని ఒక యజమాని భావోద్వేగానికి గురయ్యారు.
సోషల్ మీడియా స్పందన: ఈ వీడియో చూసిన నెటిజన్లు కుక్కల తెలివితేటలను, నాయకత్వ లక్షణాలను కొనిాడుతున్నారు. “మనుషులం గూగుల్ మ్యాప్స్ ఉన్నా దారి తప్పిపోతాం, కానీ ఒక చిన్న కార్గి 6 కుక్కలను 17 కిలోమీటర్ల మేర హైవేల గుండా నడిపించి ఇంటికి చేర్చడం అద్భుతం” అని ఒకరు వ్యాఖ్యానించారు. ఇది కేవలం దారి వెతుక్కున్న కథ మాత్రమే కాదు, వాటి మధ్య ఉన్న విశ్వాసం మరియు ప్రేమకు నిదర్శనమని మరొకరు పేర్కొన్నారు.