న్యూఢిల్లీ: భారత క్రికెట్ దిగ్గజం విరాట్ కోహ్లీ తన ‘వన్8’ (One8) బ్రాండ్ తరఫున ఢిల్లీలో కొత్త ‘రెడ్ షూస్ కలెక్షన్’ (Red Shoes Collection)ను ప్రారంభించారు. ఈ వేడుకలో తన టెస్ట్ క్రికెట్ పునరాగమనం (కమ్బ్యాక్) గురించి అడిగిన ప్రశ్నకు ఆయన ఇచ్చిన సమాధానం క్రికెట్ ప్రపంచంలో పెద్ద సంచలనంగా మారింది.
ఈ కొత్త మోడల్ ఎరుపు రంగు షూల ధరకు, విరాట్ కోహ్లీ టెస్ట్ క్రికెట్ కెరీర్లో చేసిన మొత్తం పరుగులు 9,230ని సూచించేలా.. సరిగ్గా ₹9,230 రూపాయలుగా ధర నిర్ణయించారు.
జర్నలిస్ట్ వ్యంగ్య ప్రశ్న – కోహ్లీ నవ్వుతూ ఇచ్చిన సమాధానం:
ఈ వేడుకలో ఒక జర్నలిస్ట్ విరాట్ కోహ్లీని ఉద్దేశించి.. “ఈ రెడ్ షూ ధర ₹9,230 గా ఉంది, ఇది మీ టెస్ట్ పరుగుల సంఖ్య. అంటే, భవిష్యత్తులో ఈ షూ ధరను మరింత పెంచడం కోసం మీరు మళ్లీ టెస్ట్ క్రికెట్లోకి గ్రాండ్గా కమ్బ్యాక్ ఇవ్వాలనుకుంటున్నారా?” అని కాస్త వ్యంగ్యంగా, వినూత్నంగా ప్రశ్నించారు.
ఈ ప్రశ్నకు కోహ్లీ ఏమాత్రం తడుముకోకుండా, చేతులు ఊపుతూ నవ్వుతూనే.. “లేదు, లేదు.. నేను ఈ షూను దీనికంటే తక్కువ ధరకైనా అమ్మేసుకుంటాను. టెస్ట్ క్రికెట్తో నా పని అయిపోయింది (I AM DONE)” అని అత్యంత స్పష్టంగా సమాధానమిచ్చి అక్కడ ఉన్నవారందరినీ ఆశ్చర్యపరిచారు.
సోషల్ మీడియాలో వైరల్ – అభిమానుల్లో చర్చ:
టెస్ట్ క్రికెట్లో ‘రన్ మెషీన్’గా పేరొందిన విరాట్ కోహ్లీ, తన సుదీర్ఘ టెస్ట్ ప్రయాణానికి ఇక చాలు అనేలా “ఐ యామ్ డన్” అని బహిరంగ వేదికపై మాట్లాడటం.. ప్రస్తుతం సోషల్ మీడియాలో దావానంలా వ్యాపించింది. కోహ్లీ చేసిన ఈ వ్యాఖ్యలు అతని కోట్లాది మంది అభిమానులను తీవ్ర నిరాశకు గురిచేయడమే కాకుండా, క్రీడా వర్గాల్లో పెద్ద ఎత్తున చర్చకు దారితీశాయి.