చెన్నై: విజయ్‌తో వివాహేతర సంబంధంలో ఉన్న సదరు నటి ఎవరనే విషయాన్ని సంగీత తన పిటిషన్‌లో పేర్కొనలేదు. అవసరమైతే ఆ నటిపై విడిగా కేసు వేస్తానని ఆమె వెల్లడించారు.
శ్రీలంక తమిళ నేపథ్యం ఉన్న కుటుంబంలో జన్మించిన సంగీత, చిన్నప్పటి నుంచి లండన్‌లోనే పెరిగారు. ఆమె తండ్రి స్వర్ణలింగం లండన్‌లో ప్రముఖ వ్యాపారవేత్త. 1990ల చివరలో విజయ్‌కి వీరాభిమానిగా ఉన్న సమయంలో వీరి పరిచయం మొదలైంది. ఒక షూటింగ్ సమయంలో కలిసిన తర్వాత, విజయ్ తల్లిదండ్రులు సంగీత తల్లిదండ్రులను కలిసి మాట్లాడి పెళ్లి నిశ్చయించారు. వీరిద్దరూ 3 ఏళ్ల పాటు ప్రేమించుకుని, ఆగస్టు 25, 1999న వివాహం చేసుకున్నారు. వీరికి కుమారుడు జేసన్ సంజయ్, కుమార్తె దివ్య సాషా ఉన్నారు.
సాధారణంగా ఏ సినిమా వేడుకకైనా విజయ్‌తో పాటు సంగీత కూడా వచ్చేవారు. కానీ, గత కొన్నేళ్లుగా ఆమె విజయ్‌తో కలిసి కనిపించడం లేదు. చివరిగా 2020లో జరిగిన ‘మాస్టర్’ ఆడియో లాంచ్‌లో ఆమె కనిపించారు. ఆ తర్వాత గత 6 ఏళ్లుగా ఆమె ఏ వేడుకలోనూ పాల్గొనలేదు. పిల్లలు లండన్‌లో చదువుతుండటంతో వారికి తోడుగా ఆమె వెళ్లారని అప్పట్లో వార్తలు వచ్చాయి. విజయ్ ‘తమిళగ వెట్రి కళగం’ (TVK) పార్టీని స్థాపించినప్పుడు కూడా ఆమె రాలేదు.
ఈ నేపథ్యంలో, సంగీత చెంగల్పట్టు ఫ్యామిలీ కోర్టులో విడాకుల పిటిషన్ దాఖలు చేసినట్లు వార్తలు వస్తున్నాయి. ఆ పిటిషన్‌లో ఆమె ఇలా పేర్కొన్నట్లు సమాచారం: “నా భర్తకు ఒక నటితో సంబంధం ఉంది. ఆ విషయాన్ని 2021లో కనిపెట్టి హెచ్చరించాను. కానీ ఆయన పశ్చాత్తాపం లేకుండా నన్ను దూరం పెట్టి ఆ నటితోనే సంబంధం కొనసాగించారు. ఆ నటి తరచుగా నా భర్తతో కలిసి విదేశాలకు వెళ్తోంది. అక్కడ విజయ్‌తో కలిసి ఉన్న ఫోటోలను ఆమె సోషల్ మీడియాలో పోస్ట్ చేయడం వల్ల నాకు, నా పిల్లలకు అవమానంగా ఉంది. గత 3 ఏళ్లుగా మేము విడివిడిగానే ఉంటున్నాము. ప్రస్తుతానికి ఆ నటి పేరు చెప్పడం లేదు కానీ, అవసరమైతే ఆమెపై కేసు వేస్తాను. నా భర్తకు, ఆ నటికీ మధ్య ఉన్న సంబంధానికి సంబంధించిన ఆధారాలను విడుదల చేస్తాను.”