నడిరోడ్డుపై ఘోరం..! తుపాకీ కాల్పులతో ఉలిక్కిపడిన ప్రజలు.. మాజీ వార్డు కౌన్సిలర్‌పై విచక్షణారహితంగా కాల్పులు.. ఒళ్లు గగుర్పాటుకు గురిచేసే ..!

పాట్నాలోని బుద్ధా కాలనీ పోలీస్ స్టేషన్ పరిధిలోని చక్రామ్ రోడ్డులో ఉన్న ఓ అపార్ట్‌మెంట్ సముదాయం వద్ద బుధవారం రాత్రి కాల్పుల ఘటన చోటుచేసుకుంది.

అక్కడికి రెండు ద్విచక్ర వాహనాలపై వచ్చిన ముగ్గురు దుండగులు, 24వ వార్డు ప్రస్తుత కౌన్సిలర్ జ్ఞానవతి దేవి భర్త, మాజీ కౌన్సిలర్ అయిన అనిల్ కుమార్ యాదవ్‌ను లక్ష్యంగా చేసుకుని తుపాకీతో కాల్పులు జరిపినట్లు సమాచారం. ఆయన అపార్ట్‌మెంట్ కార్యాలయంలో కూర్చుని ఉండగా ఈ దాడి జరిగింది. ఈ కాల్పుల్లో ఆయన శరీరంలోకి సుమారు నాలుగు నుంచి ఐదు బుల్లెట్లు దూసుకెళ్లినట్లు తెలుస్తోంది. ఈ ఘటనలో తీవ్రంగా గాయపడిన అనిల్ కుమార్ యాదవ్‌ను వెంటనే ఓ ప్రైవేట్ ఆసుపత్రికి తరలించారు.

తుపాకీ కాల్పుల శబ్దం వినగానే ఆ ప్రాంతంలోని ప్రజలు భయాందోళనకు గురయ్యారు. దాడి అనంతరం ఆ ముగ్గురు దుండగులు ఆయుధాలు చూపిస్తూ బైక్‌లపై అక్కడి నుంచి పరారైనట్లు ప్రత్యక్ష సాక్షులు తెలిపారు. సమాచారం అందుకున్న వెంటనే బుద్ధా కాలనీ పోలీసులు ఘటనా స్థలానికి చేరుకుని దర్యాప్తు ప్రారంభించారు. అక్కడ ఖాళీ బుల్లెట్ షెల్స్ (కాట్రిడ్జ్‌లు), రక్తపు మరకలు లభించినట్లు పోలీసులు వెల్లడించారు. ఘటనకు సంబంధించిన ఇతర ఆధారాలను కూడా పోలీసులు సేకరిస్తున్నారు.

మరోవైపు, ఆ అపార్ట్‌మెంట్, పరిసర ప్రాంతాల్లో అమర్చిన సీసీటీవీ కెమెరా దృశ్యాలను పోలీసులు పరిశీలిస్తున్నారు. దాడికి పాల్పడిన వ్యక్తులు ఎవరు, వారు ఎక్కడి నుంచి వచ్చారనే కోణంలో విచారణ జరుపుతున్నారు. కాల్పులకు గల కారణాలు ఇంకా తెలియరాలేదు. పాత కక్షలతో పాటు వివిధ కోణాల్లో పోలీసులు దర్యాప్తు చేస్తున్నారు. నిందితులను గుర్తించి అరెస్టు చేసేందుకు పోలీసులు గాలింపు చర్యలు ముమ్మరం చేశారు.

కాల్పుల్లో గాయపడిన అనిల్ కుమార్ యాదవ్‌కు ప్రస్తుతం ఆసుపత్రిలో అత్యవసర చికిత్స అందిస్తున్నారు. ఆయనను పరామర్శించేందుకు జన్ సురాజ్ పార్టీ అధినేత ప్రశాంత్ కిషోర్ ఆసుపత్రికి వెళ్లారు. అనిల్ యాదవ్ శరీరంలోకి నాలుగు బుల్లెట్లు దూసుకెళ్లాయని, ఆయన త్వరగా కోలుకోవాలని ప్రార్థిస్తున్నట్లు ప్రశాంత్ కిషోర్ తెలిపారు. ఈ దాడి ఘటనపై పోలీసులు దర్యాప్తు కొనసాగిస్తుండగా, సీసీటీవీ దృశ్యాల ఆధారంగా నిందితులను గుర్తించే ప్రయత్నాలను వేగవంతం చేశారు.