ముంబై: మహారాష్ట్రలో భారత వైమానిక దళ (IAF) అధికారి భార్యకు ఎదురైన ఒక భయంకరమైన ఘోరం దేశవ్యాప్తంగా తీవ్ర సంచలనం సృష్టిస్తోంది. బాధితురాలిపై లైంగిక దాడి, బెదిరింపులకు పాల్పడి డబ్బు వసూలు చేయడం, బలవంతంగా మతమార్పిడికి ఒత్తిడి తీసుకురావడం వంటి తీవ్రమైన ఆరోపణల కింద పోలీసులు కేసు నమోదు చేసి దర్యాప్తు చేపట్టారు. ఈ వ్యవహారంలో ఇప్పటికే ఇద్దరు నిందితులను పోలీసులు అరెస్ట్ చేశారు.
మహారాష్ట్రలోని నాగ్పూర్లో చోటుచేసుకున్న ఈ దారుణ ఉదంతం ఆలస్యంగా వెలుగుచూసింది. తన పాత పాఠశాల స్నేహితుడు (స్కూల్ మేట్) తనను నమ్మించి మోసం చేశాడని, ఆపై అత్యాచారానికి పాల్పడి, చేతబడి మరియు తీవ్ర బెదిరింపులతో బలవంతంగా మతమార్పిడి చేశాడని బాధితురాలు పోలీసులకు ఇచ్చిన ఫిర్యాదులో పేర్కొంది.
అసలేం జరిగింది?
ఈ ఘోర ఉదంతానికి సంబంధించి బాధితురాలు ఇచ్చిన ఫిర్యాదు మేరకు అయాజ్ తాజ్ మదారే, అతని స్నేహితుడు అమీన్ షేక్ అనే ఇద్దరు నిందితులను పోలీసులు అరెస్ట్ చేశారు. అలాగే, ఈ మతమార్పిడి తంతు నిర్వహించిన మధ్యప్రదేశ్కు చెందిన ఒక మౌలానా కోసం పోలీసులు ప్రత్యేక బృందాలుగా ఏర్పడి గాలిస్తున్నారు.
ఈ ఘటనకు సంబంధించిన ఒక భయంకరమైన వీడియో ప్రస్తుతం సోషల్ మీడియాలో విపరీతంగా వైరల్ అవుతోంది. ఆ వీడియోలో 24 ఏళ్ల వివాహిత, “నన్ను వదిలేయండి.. ప్లీజ్” అంటూ భయంతో గట్టిగా ఏడుస్తూ బతిమాలుకోవడం కనిపిస్తోంది. అయినప్పటికీ, అయాజ్ తాజ్ మదారే (26) అనే యువకుడు ఆ మహిళ చేతులను బలవంతంగా పట్టుకుని, కొన్ని మంత్రాలు చదువుతున్నాడు. ఆ మహిళ అతని పట్టు నుండి తప్పించుకోవడానికి తీవ్రంగా పోరాడటం ఆ వీడియోలో స్పష్టంగా కనిపిస్తోంది. ప్రస్తుతం ఈ వీడియోనే ఈ కేసులో కీలక ఆధారంగా మారింది.
జ్యూస్లో మత్తుమందు కలిపి..
బాధిత 24 ఏళ్ల మహిళ నాగ్పూర్లో రియల్ ఎస్టేట్ ఏజెంట్గా పనిచేస్తోంది. ఆమె భర్త ఇండియన్ ఎయిర్ఫోర్స్లో అధికారిక హోదాలో విధుల్లో ఉన్నారు. ఆయన ప్రస్తుతం దేశంలోని వేరే నగరంలో పనిచేస్తున్నారు. గత 2025 ఫిబ్రవరి నెలలో, ఆ మహిళ పాత క్లాస్మేట్ అయిన అయాజ్ తాజ్ మదారే.. ల్యాండ్ బిజినెస్ (భూమి కొనుగోలు) గురించి మాట్లాడాలని చెప్పి, ఆమెను వార్ధా రోడ్డులోని ఒక హోటల్కు పిలిచాడు.
అక్కడ ఆమెకు ఇచ్చిన జ్యూస్లో మత్తుమందు కలిపినట్లు తెలుస్తోంది. ఆమె స్పృహ కోల్పోయిన స్థితిలో అయాజ్ ఆమెపై క్రూరంగా లైంగిక దాడికి పాల్పడటమే కాకుండా.. ఆ దృశ్యాలను మొబైల్లో వీడియోలు, ఫోటోలు తీశాడు. ఆ తర్వాత ఆ నగ్న వీడియోలను చూపిస్తూ అయాజ్ ఆమెను బ్లాక్మెయిల్ చేయడం ప్రారంభించాడు. వీడియోలను ఇంటర్నెట్లో పెడతానని భయపెట్టి, ఆమెపై పలుమార్లు లైంగికంగా వేధింపులకు పాల్పడటమే కాకుండా.. ఆమె నుండి సుమారు రూ. 3.09 లక్షల నగదును కూడా గుంజాడు.
బలవంతపు మతమార్పిడి తంతు:
ఈ క్రమంలోనే ఆ మహిళను ఇస్లాం మతంలోకి మారాలని అయాజ్ తీవ్రంగా ఒత్తిడి చేశాడు. గత మే నెలలో, ఆమెను నాగ్పూర్లోని కల్మేశ్వర్ ప్రాంతానికి బలవంతంగా తీసుకువెళ్లి.. అక్కడ అమీన్ షేక్ (30) మరియు మధ్యప్రదేశ్కు చెందిన హజ్రత్ మౌలానా అనే వ్యక్తులకు పరిచయం చేశాడు.
అప్పుడు వారంతా కలిసి ఆ మహిళకు కొన్ని మతపరమైన ఆచారాలు, తంతు నిర్వహించారు. “నీ మతమార్పిడి పూర్తయింది, ఇప్పటి నుండి నువ్వు అయాజ్ భార్యవు” అని వారు ఆమెను బెదిరించారు. ప్రస్తుతం ఇంటర్నెట్లో వైరల్ అవుతున్న వీడియో ఈ మతమార్పిడి తంతుకు సంబంధించినదేనని పోలీసులు నిర్ధారించారు. ఆ తర్వాత కూడా సదరు మహిళపై మళ్లీ లైంగిక దాడికి ప్రయత్నించారు.
పోలీసుల కఠిన చర్యలు:
బాధితురాలు వివాహిత కావడం, సమాజంలో అవమానం జరుగుతుందనే భయంతో ఇన్నాళ్లూ ఈ దారుణాన్ని ఎవరికీ చెప్పుకోలేక మౌనంగా భరించింది. అయితే, ఇటీవల ఆమె భర్త డ్యూటీ ముగించుకుని ఇంటికి తిరిగి వచ్చినప్పుడు, ఆమె ఏడుస్తూ తనకు జరిగిన ఘోరాలన్నింటినీ వివరించింది. భర్త ఇచ్చిన ధైర్యంతో ఆ దంపతులు జూన్ 13న నాగ్పూర్ పోలీస్ స్టేషన్లో అధికారికంగా ఫిర్యాదు చేశారు.
ఫిర్యాదు ఆధారంగా కేసు నమోదు చేసిన పోలీసులు.. ప్రధాన నిందితుడు అయాజ్ తాజ్ మదారేతో పాటు అమీన్ షేక్ను అరెస్ట్ చేశారు. పరారీలో ఉన్న హజ్రత్ మౌలానా కోసం గాలిస్తున్నారు. నిందితులపై మోసం, బెదిరింపులు, అత్యాచారం, బలవంతపు మతమార్పిడి చట్టాల కింద విభిన్న సెక్షన్ల ద్వారా కేసులు నమోదు చేశారు. కోర్టు నిందితులకు 5 రోజుల పోలీస్ కస్టడీ విధించింది.
Leave a Reply