“నమ్మలేకపోతున్నాం!.. 15 ఏళ్ల 100 రోజులు!”. ప్రపంచాన్ని ఆశ్చర్యపరిచిన కోడి.. గిన్నిస్ రికార్డు సృష్టించి 15 ఏళ్లు దాటిన కోడి జీవిత రహస్యం ఏమిటి?

సాధారణంగా కోళ్లు కొన్నేళ్లు మాత్రమే జీవిస్తాయని చాలా మంది అనుకుంటారు. కానీ, అమెరికాకు చెందిన ‘గెర్టీ’ (Gertie) అనే కోడి ప్రపంచాన్ని ఆశ్చర్యపరిచింది.

15 ఏళ్ల 100 రోజుల వయసున్న ఈ కోడి, ప్రపంచంలోనే అత్యధిక కాలం జీవించి ఉన్న కోడిగా గిన్నిస్ వరల్డ్ రికార్డు (Guinness World Record) సాధించింది. గోల్డెన్ సెబ్రైట్ (Golden Sebright) జాతికి చెందిన గెర్టీ, గోధుమ మరియు నలుపు రంగు ఈకలతో ప్రత్యేకమైన రూపాన్ని కలిగి ఉంటుంది. దీని యజమాని ఫ్రాంక్ డ్యూరెక్, 2010లో ఆన్‌లైన్ ద్వారా కొనుగోలు చేసిన ఎనిమిది కోడిపిల్లల్లో గెర్టీ ఒకటి.

వయసు పెరిగే కొద్దీ గెర్టీ కంటి చూపు మందగించింది. ముఖ్యంగా 2024లో రాత్రి వేళల్లో కోళ్ల గూట్లోకి (coop) ఎక్కడానికి కూడా అది ఇబ్బంది పడింది. ఇతర కోళ్లు దాడి చేయడంతో దాని తలపై గాయమైన ఘటన కూడా జరిగింది. దీంతో ఫ్రాంక్, గెర్టీని ఇంట్లోకి తీసుకొచ్చి గాయానికి చికిత్స చేయడంతో పాటు దానికంటూ ఒక సురక్షితమైన స్థలాన్ని ఏర్పాటు చేశాడు. ప్రస్తుతం మనుషుల సామీప్యాన్ని కోరుకుంటున్న గెర్టీ, తన యజమాని మాట్లాడేటప్పుడు, పాడేటప్పుడు అరుస్తూ ప్రతిస్పందిస్తుందని చెబుతున్నారు. ఇంట్లో పెంచుకునే ఓ పెద్ద కుక్కతో కూడా ఇది స్నేహంగా మెలుగుతోంది.

గెర్టీ దీర్ఘాయుష్షుకు మంచి ఆహారం, సరైన సంరక్షణ, సురక్షితమైన వాతావరణం, నిరంతర పర్యవేక్షణ ముఖ్య కారణాలని దాని యజమాని నమ్ముతున్నాడు. వృద్ధాప్యం కారణంగా గుడ్లు పెట్టడం మానేసినప్పటికీ, తన ప్రస్తుత వాతావరణానికి తగ్గట్టుగా జీవించడం నేర్చుకున్న గెర్టీ అందరి దృష్టిని ఆకర్షిస్తోంది. గతంలో టెక్సాస్ రాష్ట్రానికి చెందిన ‘పెరల్’ (Pearl) అనే కోడి పేరిట ఉన్న రికార్డును గెర్టీ బద్దలు కొట్టినట్లు వార్తలు చెబుతున్నాయి. పెంపుడు జంతువుల పట్ల చూపే శ్రద్ధ, వాటికి సురక్షితమైన వాతావరణం కల్పించడం ఎంత ముఖ్యమో గెర్టీ జీవితం మనకు తెలియజేస్తోంది.