ప్రముఖ మరాఠీ గాయకుడు రాహుల్ దేశ్పాండే ఏడాది క్రితం తాను విడాకులు తీసుకుంటున్నట్లు ప్రకటించి అందరినీ ఆశ్చర్యపరిచారు. ఆయన తన భార్య నేహా దేశ్పాండేతో విడాకులు తీసుకున్నారు. ఆ సమయంలో ఆయనపై సోషల్ మీడియాలో విపరీతమైన ట్రోలింగ్ జరిగింది. రాహుల్ స్వయంగా సోషల్ మీడియా వేదికగా ఈ విషయాన్ని వెల్లడించారు.
ఆ ప్రకటన తర్వాత చాలా మంది ఆయనకు ఫోన్ చేశారని, కానీ తాను ఎవరి ఫోన్ ఎత్తలేదని రాహుల్ ఒక ఇంటర్వ్యూలో చెప్పారు. ‘మిత్ర మ్హణే’ అనే ప్రోగ్రామ్కు ఇచ్చిన ఇంటర్వ్యూలో ఆయన తన విడాకుల గురించి మనసు విప్పి మాట్లాడారు.
ఈ ఇంటర్వ్యూలో రాహుల్ మాట్లాడుతూ.. “మా మధ్య సంబంధాలు ఇప్పటికీ చాలా బాగున్నాయి. మేము రేణుకకు (కుమార్తె) తల్లిదండ్రులం, ఎప్పటికీ అలాగే ఉంటాం. మొన్న నేను రేణుక గురించి పెట్టిన పోస్ట్లో నేహా ఉంది, నేహా పెట్టిన పోస్ట్లో నేను ఉన్నాను. సాధారణంగా ఒక బంధం ముగిసిన తర్వాత.. అది నీ తప్పు అంటే నీ తప్పు అని ఒకరినొకరు నిందించుకుంటారు. కానీ మా విషయంలో అలాంటిదేమీ లేదు. విడాకులు ఎవరూ కావాలని తీసుకోరు, దానికి రకరకాల కారణాలు ఉంటాయి. అందులో మీ తప్పు ఉండొచ్చు, ఎదుటివారి తప్పు ఉందని మీకు అనిపించొచ్చు. ఇలాంటి విషయాలకు ఎప్పుడూ రెండు వైపులా కారణాలు ఉంటాయి. అనవసరంగా దీనిని పెద్ద భూతద్దంలో పెట్టి చూడకూడదు” అని అన్నారు.
ఆయన ఇంకా కొనసాగిస్తూ.. “విడాకుల ప్రకటన తర్వాత చాలా మంది ఫోన్ చేశారు, కానీ నేను ఎవరి ఫోన్ ఎత్తలేదు. ఎందుకంటే ఇది నా వ్యక్తిగత విషయం, దీని గురించి ఎవరితోనూ మాట్లాడాలని నాకు లేదు. ఫోన్ ఎత్తి నేను ఏం చెప్పాలి? నేను ఎలా కరెక్ట్, నాకే ఎలా అన్యాయం జరిగిందని నేను ఎందుకు చెప్పాలి? ఎందుకంటే అలాంటిదేమీ జరగలేదు. విడాకులు అనేవి ఎవరి జీవితంలోనైనా జరగొచ్చు. దీనివల్ల ఆ ఇద్దరు వ్యక్తులు చెడ్డవారు అయిపోరు. ఎవరో ఒకరిదే తప్పు అని అనడానికి లేదు. ‘వీడికి బుద్ధి లేదు’, ‘బయట ఎక్కడో అఫైర్ (లఫ్డా) ఉండి ఉంటుంది’ అని మాట్లాడే మాటలకు అంతు ఉండదు” అని రాహుల్ ఆవేదన వ్యక్తం చేశారు.