ఢిల్లీ: మెడికల్ అడ్మిషన్లకు సంబంధించిన ఒక కేసులో, తాను జారీ చేసిన ఉత్తర్వుల గురించి తన సోదరుడికి ఫోన్ చేసి మాట్లాడిన ఒక వ్యక్తిపై సుప్రీంకోర్టు న్యాయమూర్తి జస్టిస్ సూర్యకాంత్ తీవ్రస్థాయిలో విరుచుకుపడ్డారు.
“నేను ఆ ఉత్తర్వును ఎలా ఇస్తానని నా సోదరుడిని అడిగేంత ధైర్యం అతనికి ఎక్కడి నుండి వచ్చింది? ఆ వ్యక్తి భారతదేశం వెలుపల దాక్కున్నా సరే, అతడిని ఎలా పట్టుకోవాలో నాకు తెలుసు” అని న్యాయమూర్తి ఘాటుగా హెచ్చరించారు.
అసలేం జరిగింది? మెడికల్ అడ్మిషన్లకు సంబంధించిన ఒక పిటిషన్‌ను విచారిస్తున్న సమయంలో జస్టిస్ సూర్యకాంత్ ఈ వ్యాఖ్యలు చేశారు. ఒక వ్యక్తి తన సోదరుడిని సంప్రదించి, కోర్టు తీర్పుపై అభ్యంతరాలు వ్యక్తం చేశాడని ఆయన తెలిపారు. సదరు వ్యక్తిపై ‘క్రిమినల్ కోర్టు ధిక్కార’ (Criminal Contempt) చర్యలు ఎందుకు తీసుకోకూడదని ఆయన ప్రశ్నించారు.
హర్యానా ప్రభుత్వ తరపు న్యాయవాదితో మాట్లాడుతూ.. “నా సోదరుడికి ఫోన్ చేసి, న్యాయమూర్తి ఇలాంటి ఉత్తర్వు ఎలా ఇచ్చారని అడగడానికి అతనికి ఎంత ధైర్యం? అతను నాకు షరతులు విధిస్తున్నాడా? దీనిపై మీరు విచారణ జరపాలి” అని ఆదేశించారు.
23 ఏళ్లుగా ఇలాంటి వారిని చూస్తున్నాను: న్యాయమూర్తి తన ఆగ్రహాన్ని కొనసాగిస్తూ.. “అతను విదేశాలకు వెళ్లి దాక్కున్నా సరే, ఇలాంటి వ్యక్తులను ఎలా హ్యాండిల్ చేయాలో నాకు తెలుసు. ఇటువంటి ప్రయత్నాలు ఇకపై ఎప్పుడూ చేయవద్దు. గత 23 ఏళ్లుగా నేను ఇలాంటి వ్యక్తులను చాలా మందిని చూశాను” అని హెచ్చరించారు.
కేసు నేపథ్యం: మీరట్‌లోని సుభారతి వైద్య కళాశాలలో పీజీ కోర్సుల్లో చేరేందుకు, బౌద్ధ మత మైనారిటీ కోటా కింద ప్రయోజనాలు కల్పించాలని కోరుతూ దాఖలైన పిటిషన్ విచారణ సందర్భంగా ఈ పరిణామం చోటుచేసుకుంది.
నిఖిల్ కుమార్ పునియా, ఏక్తా పునియా అనే అన్నదమ్ములు తాము బౌద్ధ మతంలోకి మారినందున మైనారిటీ కోటాకు అర్హులమని సుప్రీంకోర్టును ఆశ్రయించారు. గతంలో వారు జనరల్ కేటగిరీలో దరఖాస్తు చేసుకున్నప్పటికీ, మత మార్పిడి తర్వాత ఈ ప్రయోజనం పొందవచ్చని వాదించారు. అయితే, వారి అభ్యర్థనను తోసిపుచ్చిన సుప్రీంకోర్టు ఆ పిటిషన్‌ను కొట్టివేసింది. ఈ తీర్పుపైనే అసహనం వ్యక్తం చేస్తూ సదరు వ్యక్తి న్యాయమూర్తి సోదరుడికి ఫోన్ చేసినట్లు తెలుస్తోంది.