“నాకు ఇంకా జీతమే ఇవ్వలేదు..! నేనేమైనా బానిసనా? నా వల్ల ‘ఎస్ మ్యాన్’లా ఉండటం సాధ్యం కాదు.” పాక్ క్రికెట్ బోర్డు పరువును బహిరంగంగా తీసిన మాజీ కోచ్.. ఆస్ట్రేలియా దిగ్గజం సంచలన వ్యాఖ్యలు.!

పాకిస్తాన్ టెస్ట్ జట్టు మాజీ ప్రధాన కోచ్ జాసన్ గిలెస్పీ, పాకిస్తాన్ క్రికెట్ బోర్డు (PCB) పై మరోసారి తీవ్రస్థాయిలో సంచలన ఆరోపణలు గుప్పించారు.

2024 డిసెంబరులోనే కోచ్ పదవి నుంచి తప్పుకున్నప్పటికీ, పీసీబీ తనకు చెల్లించాల్సిన వేల డాలర్ల వేతన బకాయిలను ఇంకా చెల్లించలేదని ఆయన బహిరంగంగా ఆరోపించారు.

బ్రిటిష్ మీడియా సంస్థ ‘ది టెలిగ్రాఫ్’కు ఇచ్చిన ఇంటర్వ్యూలో గిలెస్పీ మాట్లాడుతూ, పాకిస్తాన్ క్రికెట్ జట్టుతో తనకు ఎదురైన చేదు అనుభవాలను పంచుకోవడంలో ఎలాంటి సంకోచం లేదని స్పష్టం చేశారు. తన పదవిని కాపాడుకోవడానికో లేదా పూర్తి జీతం పొందడానికో ఎల్లప్పుడూ ఒక ‘ఎస్ మ్యాన్’ లాగా గుడ్డిగా తలఊపడానికి తాను సిద్ధంగా లేనని, అన్యాయం జరుగుతుంటే మౌనంగా ఉండటం తన సిద్ధాంతాలకు విరుద్ధమని ఆయన పేర్కొన్నారు.

ప్రకటన

పాకిస్తాన్ జట్టులో మరో కీలక వ్యక్తి అయిన ఆకిబ్ జావెద్ పెత్తనం, తన పనిపై చూపిన ప్రభావం గురించి గిలెస్పీ తీవ్రంగా విమర్శించారు. జట్టులో ఫాస్ట్ బౌలింగ్ సంస్కృతిని పునరుద్ధరించడానికి, మంచి పేస్ మరియు బౌన్స్ ఉండే పిచ్‌లను రూపొందించడానికే తనను కోచ్‌గా నియమించారని తెలిపారు. అయితే, జట్టులో ఆకిబ్ జావెద్ ఆధిపత్యం పెరిగేకొద్దీ, తన బాధ్యతలు, అధికారాలను క్రమంగా తగ్గిస్తూ తనను పూర్తిగా పక్కన పెట్టేశారని ఆరోపించారు.

ఈ పరిస్థితులు తనకు తీవ్ర అవమానాన్ని కలిగించాయని, కోచింగ్ కెరీర్‌ను కొనసాగించాలా వద్దా అనే అనుమానాన్ని కూడా తనలో రేకెత్తించాయని చెప్పారు. అంతేకాకుండా, పాకిస్తాన్ జట్టు వరుసగా ఘోర పరాజయాలు మూటగట్టుకుంటున్నప్పటికీ, గ్యారీ కిర్‌స్టన్ మరియు తనలాంటి మాజీ కోచ్‌లపై మాత్రమే నిందలు వేయడాన్ని ఆయన తీవ్రంగా ప్రశ్నించారు. పాకిస్తాన్ క్రికెట్ బోర్డులోని పరిపాలనా లోపాలను, అంతర్జాతీయ కోచ్‌లను వారు చూసే తీరును గిలెస్పీ వ్యాఖ్యలు మరోసారి బట్టబయలు చేశాయి.