‘నాతో శృంగారంలో పాల్గొనకపోతే నీ కెరీర్ నాశనం చేస్తా’.. జేపీ మోర్గాన్ మహిళా అధికారి వేధింపుల చాట్ వైరల్

జేపీ మోర్గాన్ చేస్ ఎగ్జిక్యూటివ్ డైరెక్టర్ లోర్నా హజ్దిని (Lorna Hajdini) ప్రస్తుతం న్యూయార్క్ నగరంలో ఒక తీవ్రమైన న్యాయ పోరాటాన్ని ఎదుర్కొంటున్నారు. తన కింద పనిచేసే ఒక జూనియర్ ఉద్యోగి ఆమెపై లైంగిక వేధింపులు, బలవంతపు శృంగారం మరియు జాతి వివక్ష (Racial Harassment) వంటి ఆరోపణలు చేశారు.

సాధారణంగా పని ప్రదేశాల్లో పురుషుల నుంచి మహిళలకు వేధింపులు ఎదురవుతుంటాయి, కానీ ఇక్కడ ఒక మహిళా అధికారి తన అధికారాన్ని అడ్డం పెట్టుకుని ఒక పురుషుడిని వేధించడం చర్చనీయాంశమైంది.

ఉద్యోగం కోసం లొంగిపోవాల్సి వచ్చింది
బాధితుడి గుర్తింపు బయటకు రాకుండా ఉండేందుకు ఈ కేసును ‘జాన్ డో’ (John Doe) అనే పేరుతో దాఖలు చేశారు. లోర్నా హజ్దిని తన హోదాను వాడుకుని ఆ ఉద్యోగిపై ఒత్తిడి తెచ్చి, అతని ఇష్టానికి వ్యతిరేకంగా శారీరక సంబంధానికి బలవంతం చేసిందని ఫిర్యాదులో పేర్కొన్నారు. ఉద్యోగం పోతుందనే భయంతో ఆ జూనియర్ ఉద్యోగి ఆమెకు లొంగిపోవాల్సి వచ్చిందని ఆవేదన వ్యక్తం చేశారు.

కెరీర్ నాశనం చేస్తానని బెదిరింపులు
కోర్టు పత్రాల ప్రకారం.. హజ్దిని ఆ ఉద్యోగితో మాట్లాడుతూ, “నువ్వు త్వరలో నాతో సంబంధం పెట్టుకోకపోతే నిన్ను నాశనం చేస్తాను.. మర్చిపోకు, నువ్వు పూర్తిగా నా సొత్తు” అని బెదిరించినట్లు తెలుస్తోంది. ఈ ఒత్తిడి నేరుగా అతని వృత్తి జీవితానికి సంబంధించినది కావడంతో అతను తీవ్ర మానసిక ఆందోళనకు గురయ్యాడు.

‘నేను వారించినా ఆమె ఆగలేదు’
“నేను పదేపదే వద్దని చెప్పినా ఆమె వినలేదు. నేను చాలా అసౌకర్యంగా ఉన్నాను, దయచేసి నన్ను వదిలేయండి అని వేడుకున్నాను” అని బాధితుడు ఫిర్యాదులో పేర్కొన్నారు. కానీ ఆమె ఆ విజ్ఞప్తులను పట్టించుకోకుండా వేధింపులు కొనసాగించినట్లు ఆరోపణలు ఉన్నాయి.

‘మై లిటిల్ అరబ్ బాయ్’ – జాతి వివక్ష
లైంగిక వేధింపులతో పాటు ఆమె జాతి వివక్షకు కూడా పాల్పడినట్లు బాధితుడు ఆరోపించారు. అతన్ని ఉద్దేశించి “నువ్వు దీన్ని సంపాదించుకోవాలి నా చిన్న అరబ్ అబ్బాయి (My little Arab Boy)” అని వ్యాఖ్యానించేదని, ఇవి తనను మానసికంగా కుంగదీశాయని పేర్కొన్నారు.

మత్తు పదార్థాలు మరియు ఇంటికి రావడం
తన ఇష్టానికి వ్యతిరేకంగా ఆమె తనకు మత్తు పదార్థాలు ఇచ్చిందని, పిలవకుండానే తన ఇంటికి వచ్చి తనపై ఒత్తిడి తెచ్చిందని బాధితుడు కోర్టుకు తెలిపారు. ప్రతి విషయాన్ని ఆమె తన ప్రొఫెషనల్ భవిష్యత్తుతో ముడిపెట్టి భయపెట్టేదని వివరించారు.

జేపీ మోర్గాన్ స్పందన
ఈ ఆరోపణలను జేపీ మోర్గాన్ చేస్ బ్యాంక్ తోసిపుచ్చింది. తమ అంతర్గత విచారణలో ఇలాంటి వేధింపులు జరిగినట్లు ఎలాంటి ఆధారాలు లభించలేదని, ఈ వాదనల్లో పస లేదని బ్యాంక్ యాజమాన్యం స్పష్టం చేసింది.

ఎవరీ లోర్నా హజ్దిని?
లోర్నా జేపీ మోర్గాన్ లో 10 ఏళ్లకు పైగా పనిచేశారు. ఆమె లివరేజ్డ్ ఫైనాన్స్ విభాగంలో ఎగ్జిక్యూటివ్ డైరెక్టర్‌గా ఉండేవారు. ఆమె ఆస్తుల విలువ మిలియన్ల డాలర్లలో ఉంటుందని అంచనా. ఈ స్థాయిలో ఉన్న అధికారుల వార్షిక వేతనం బోనస్ కాకుండానే సుమారు $200,000 (సుమారు ₹1.67 కోట్లు) కంటే ఎక్కువగా ఉంటుంది.