కన్న కూతురినే తండ్రి దారుణంగా హత్య చేసి, మూడు అడుగుల గుంతలో పాతిపెట్టిన దారుణ ఘటన హిమాచల్ ప్రదేశ్‌లో వెలుగుచూసి తీవ్ర కలకలం రేపింది.
అదృశ్యమైనట్లుగా గాలిస్తున్న ఆ బాలిక, చివరిసారిగా తన తల్లికి ఫోన్ చేసి, “అమ్మా, నాన్న ఇంటి పక్కన పెద్ద గోతి తవ్వుతున్నాడు” అని భయపడుతూ చెప్పిన మాటలే ఈ ఘోర హత్య వెనుక ఉన్న నిజాన్ని బట్టబయలు చేశాయి.
తల్లితో మాట్లాడిన కొద్ది నిమిషాలకే బాలిక మొబైల్ స్విచ్ ఆఫ్ అయిపోయింది. ఆ తర్వాత ఆమె అనుమానాస్పదంగా అదృశ్యమైంది. కుమార్తె మాటలతో తీవ్ర ఆందోళనకు గురైన తల్లి, వెంటనే బంధువులకు, స్థానిక పోలీసులకు సమాచారం అందించి గాలించడం మొదలుపెట్టింది.
అనుమానంతో ఇంటి వెనుక వైపు, పరిసర ప్రాంతాల్లో తనిఖీ చేయగా, తాజాగా తవ్వి పూడ్చిన మట్టి దిబ్బ పోలీసుల దృష్టిని ఆకర్షించింది. అనుమానం వచ్చిన పోలీసులు ఆ ప్రదేశాన్ని తవ్వి చూడగా, దాదాపు 3 అడుగుల లోతులో ఆ బాలిక అత్యంత కిరాతకంగా హత్య చేయబడి పూడ్చిపెట్టి ఉండటం బయటపడింది.
ఈ హృదయ విదారక దృశ్యాన్ని చూసి తల్లి, బంధువులు గుండెలవిసేలా రోదించిన తీరు అక్కడున్న వారిని కలచివేసింది. ఈ దారుణానికి ఒడిగట్టిన కన్నతండ్రి, హత్య జరిగిన వెంటనే ఘటనా స్థలం నుండి పరారయ్యాడు. ఈ ఘటనపై కేసు నమోదు చేసుకున్న పోలీసులు, హంతక తండ్రిని పట్టుకోవడానికి ప్రత్యేక బృందాలను ఏర్పాటు చేసి ముమ్మరంగా గాలిస్తున్నారు.
కుటుంబ కలహాల వల్ల ఈ హత్య జరిగిందా లేక దీని వెనుక మరేదైనా విస్తుపోయే కారణం ఉందా అనే కోణంలో దర్యాప్తు వేగవంతం చేశారు. కన్న కూతురినే గోతి తవ్వి పాతిపెట్టిన తండ్రి కిరాతక చర్య స్థానికుల్లో తీవ్ర ఆగ్రహాన్ని, విషాదాన్ని నింపింది.